Munaıly Atyraýda 60 jyl buryn oblystyq fılarmonııa ashylǵan. Keıin óner ujymyna áıgili akter ári rejısser Nurmuhan Jantórınniń esimi berildi.
Qazir atalǵan fılarmonııanyń janynan qurylǵan birneshe óner ujymy bar. Sonyń biri – daryndy kúıshi Q.Ahmedııarov atyndaǵy «Naryn» halyq aspaptary orkestri, ekinshisi – «Murager» folklorlyq ansambli. Al «Injý marjan» bı ansambliniń bıshileri túrli saıystar men mádenı is-sharada laıyqty óner kórsetip júr. Sondaı-aq estradalyq orkestr, kameralyq ansambl men «Daryn» hory ónersúıer qaýymnyń ystyq yqylasyna bólendi.
Jaqynda fılarmonııa janynan taǵy bir óner ujymy qurylyp, «Saraıshyq» ataýy berildi. Ansamblge halyqaralyq jáne respýblıkalyq baıqaýlardyń laýreaty, sherter aspabynyń sheberi Artýr Qazıev jetekshilik etedi. Onyń aıtýyna qaraǵanda, óner ujymynyń ataýyna qatysty túrli nusqa qaralypty. Biraq tańdaý Saraıshyq ataýyna túsipti.
«О́ıtkeni keıingi jyldary Saraıshyqtaǵy ejelgi tarıhı qalashyqqa keletin sheteldik týrıster kóbeıdi. Tarıhshylar men zertteýshiler nazary aýa bastady. Osyndaı sebepterdi eskerip, ortaǵasyrlyq tarıhı mekenniń ataýy arqyly ansambldiń qaı óńirden ekenin bilýge bolady. Basty maqsatymyz – óńirdiń mádenıeti men ónerine úlesimizdi qosýdy jón kórdik», deıdi A.Qazıev.
Ansambl jetekshisiniń sózinshe, óner ujymynda 10 adam bar. Bári de – ulttyq aspaptarda oınaýdy jetik meńgergen kásibı mýzykant.
«Qazaqtyń sazy bir-birine uqsamaıtyn áni de, kúıi de kóp. Biz halqymyzdyń mýzykalyq baı murasyn osy zamanǵy stılmen úılestire óńdep, tyńdarmanǵa usynýdy jón kórdik. Ansambldiń basty ereksheligi – halqymyzdyń folklorlyq aspaptaryn kóbirek qoldaný. Bálkim, aldaǵy kezeńde ózge óńirler men elderge qazaqtyń ónerin tanystyryp, «Saraıshyq» ataýyn brendke aınaldyrýdy oılastyrdyq», deıdi ansambl jetekshisi.
Atyraý oblysy