Keıingi jyldary Kenshiler astanasynyń qoǵamdyq kóligi birshama jańardy. Soǵan sáıkes avtobýstarda «Jol ústindegi kitaphana» jobasy bar. Terezedegi QR-kodtar arqyly elektrondyq kitaptardy búginde 30 915 jolaýshy oqyp úlgeripti.
Joba 2023 jyly bastaldy. Utymdy jobanyń uıytqylary qoǵamdyq kólikti tek qatynaý quraly ǵana emes, rýhanı ári zııatkerlik ortaǵa aınaldyrýdy kózdegen. Avtobýstaǵy jolaýshylarǵa ýaqyttyń tıimdiligin usynyp, kitap oqýǵa múmkindik berý – bastamanyń negizgi ózegi.
Avtobýstardaǵy elektrondyq kitap qory úsh negizgi bólimnen turady: qazaq ádebıeti jáne shetel ádebıeti. Uıymdastyrýshylar kitaptardy irikteý kezinde ártúrli jastaǵy ári ártúrli kásibı ortadaǵy oqyrmandardyń talǵamyn eskerýge tyrysqan. Sol sebepti, elektrondyq kitap sóresinde klassıkalyq týyndylarmen qatar, shytyrman oqıǵaly jáne tanymdyq shyǵarmalar da bar. Jalpy alǵanda, QR-kodtar arqyly qazaq ádebıetiniń 21 shyǵarmasy, shetel avtorlarynyń 14 eńbegi, orys jazýshylarynyń 6 kitaby qoljetimdi.
Qazirgi ýaqytta kitaptardyń QR-kodtary Qaraǵandy qalasynyń 13 baǵytynda qatynaıtyn 60 avtobýsqa engizilgen. Atap aıtqanda, №1, 5, 19, 33, 40, 41, 43, 53, 56, 65, 70, 118e jáne 146e baǵyttary. Avtobýs salonynda ornalastyrylǵan kodty smartfon arqyly skanerlegen kez kelgen jolaýshy elektrondyq kitaphanaǵa ótip, ózine unaǵan shyǵarmany tegin oqı alady. Arnaıy tirkelý nemese qosymsha tólem talap etilmeıdi, bul jobaǵa degen qyzyǵýshylyqty odan ári arttyra túsken. Qala ákimdiginiń málimetinshe, mundaı format, ásirese jastardy kitap oqýǵa yntandyryp, kúsheıtip otyrǵan kórinedi.
Elimizdegi Ulttyq kitaphananyń elektrondyq kitaphanasy – KazNEB derekterine sáıkes, joba iske asqan ýaqyttan beri shyǵarmalardy qaraý sany 30 915-ke jetken. Keıingi jańartylǵan málimette jaýynger jazýshy Baýyrjan Momyshulynyń «Ushqan uıa» shyǵarmasy eń kóp oqylǵan shyǵarmalardyń kósh basynda tur. Bul kitapty 20 916 adam oqyǵan. Odan keıin Muhtar Áýezovtiń «Kókserek» shyǵarmasy 5 343 qaralymmen, Ǵabıt Músirepovtiń «Ulpan» romany 3 591 qaralymmen alǵa shyǵyp otyr. Bul kórsetkishter klassıkalyq qazaq ádebıetine degen qyzyǵýshylyqtyń joǵary ekenin ańǵartady. Sóıtip, qaraǵandylyq jolaýshylar dittegen jerine rýhanı saparlaıdy.
30 myńnan astam oqyrman, jalpy atalǵan kórsetkish jobanyń keleshekte de keregin kórsetedi. Sol sebepti, joba jetekshileri «Jol ústindegi kitaphananyń» sanyn kóbeıtýdi kózdep otyr.
Qaraǵandy oblysy