Elimizde halyqaralyq ǵylymı seriktestik keńeıip keledi. Bıyl Astanada Oksford ýnıversıtetiniń zertteý ınstıtýty jumysyn bastaıdy. Onda stýdentter men zertteýshilerge oqytý, tájirıbe almasý, ǵylymı zertteýlerge qatysý múmkindigi usynylady. Bul týraly Ǵylym jáne joǵary bilim mınıstri Saıasat Nurbek 24.kz telearnasyna bergen suhbatynda málimdedi.
Mınıstrdiń aıtýynsha, bıyl elimizde «Oxford Hub» ashý josparlanyp otyr. Bul alań Qazaqstan men álemge áıgili Oksford ýnıversıteti arasyndaǵy ǵylymı yntymaqtastyqty jańa deńgeıge kóterýge baǵyttalǵan. Joba aıasynda otandyq akademııalyq ortaǵa Oksfordtyń keń ǵylymı ınfraqurylymymen tikeleı baılanys ornatýǵa múmkindik beriledi. Aldaǵy ýaqytta otandyq ǵalymdar men zertteý uıymdary Oksford ýnıversıtetiniń 32 kolledji men 100-ge jýyq zertteý ınstıtýtymen birlesip ǵylymı jobalardy júzege asyra alady. Bul – halyqaralyq deńgeıdegi zertteýlerge qatysýǵa, tájirıbe almasýǵa jáne ortaq ǵylymı bastamalardy damytýǵa jol ashatyn mańyzdy qadam. Sarapshylardyń pikirinshe, «Oxford Hub»-tyń ashylýy el ǵylymynyń jahandyq akademııalyq keńistikke yqpaldasýyn jedeldetip, zertteý sapasyn arttyrýǵa jáne jas ǵalymdardyń áleýetin keńeıtýge serpin beredi. Ǵylymdaǵy seriktestik endi deklarasııa emes, shynaıy nátıjege jumys isteıtin júıege aınalady.
«Astanada tájirıbe almasý, oqytý, konsaltıng jáne ǵylymı jobalardy birlese júzege asyrýǵa jol ashylady. Bul – keıingi úsh jarym jylda atqarylǵan júıeli jumystyń eń iri nátıjesi. Mańyzdysy sol, bul bastama Oksford ýnıversıteti tarıhyndaǵy biregeı qadam sanalady. Álemge áıgili bilim ordasy osy ýaqytqa deıin shetelde fılıal da, turaqty ókildik te, zertteý ortalyqtaryn da ashpaǵan. Al Astanada iske qosylatyn ortalyq – Oksfordtyń halyqaralyq deńgeıdegi alǵashqy osyndaı tájirıbesi. Jańa alań qazaqstandyq jáne sheteldik ǵalymdar úshin ortaq platformaǵa aınalyp, bilim berý, ǵylymı saraptama jáne zertteý salalaryndaǵy seriktestikti tereńdetýge múmkindik beredi. Sondaı-aq Qazaqstannyń akademııalyq keńistiktegi bedelin arttyryp qana qoımaı, elordany óńirlik ǵylymı-hab deńgeıine kóterýge negiz bolady», deıdi mınıstr.
Osylaısha, otandyq stýdentter úshin álemdik deńgeıdegi onlaın bilimge jol ashylady. Elimizde 95 ýnıversıtettiń bilim alýshylary Oksford ýnıversıtetiniń «Saïd Business School» onlaın bıznes mektebimen birlesip ázirlengen zamanaýı kýrstarǵa qol jetkize alady. Atalǵan jobalar «Coursera» halyqaralyq onlaın oqytý platformasymen yntymaqtastyqty tereńdetý aıasynda júzege asyrylady. Baǵdarlamalar jasandy ıntellekt, tehnologııalyq menedjment jáne blokcheın, málimetterdi jelide tizbektep saqtaý tehnologııasy baǵyttaryn qamtıdy. Bul kýrstar stýdentterdiń sıfrlyq saýattylyǵyn arttyryp qana qoımaı, jańa tehnologııalardy basqarý men ınnovasııalyq sheshimderdi túsinýge múmkindik beredi. Nátıjesinde, otandyq joǵary bilim júıesi jahandyq bilim keńistigimen tyǵyz yqpaldasa túsedi.
«Jobanyń negizgi maqsaty – Qazaqstanda naqty nátıjege qol jetkizý. Bastama aıasynda stýdentterdiń bilim alýyna jan-jaqty qoldaý kórsetilip, óńirdiń akademııalyq áleýetin arttyrý kózdelgen. Oqý barysyn kúsheıtý úshin qosymsha bilim berý materıaldary, taldamalyq ınsaıttar jáne ǵylymı zertteýler usynylady. Bul materıaldar stýdentterdiń bilimin tereńdetip, oqý sapasyn jaqsartýǵa baǵyttalady. Biz jumystyń bastalýyn asyǵa kútemiz. Seriktestik qazaqstandyq joǵary bilim berý júıesine jańa serpin berip, stýdentterge jańa múmkindik beredi dep oılaımyn», deıdi Saïd Business School onlaın mektebiniń atqarýshy dırektory Kerolaın Ýılıams.
Sonymen qatar «Bolashaq» baǵdarlamasy aıasynda bilim alyp júrgen otandyq ǵalymdardy jasandy ıntellekt pen atom salasy boıynsha taǵylymdamadan ótkizýge arnaıy kvota bólingen. Zertteýshiler osy baǵytta Oksford ýnıversıtinde bilimderin shyńdaı alady.