B.Nurjanov atyndaǵy Ekibastuz MAES-1 stansasynda quny 29,1 mlrd teńgege jańa tútin murjasyn salý boıynsha iri ınvestısııalyq joba júzege asa bastady. Atalǵan kásiporyn otandyq energııa óndirisiniń besten birin berip otyr.
«B.Nurjanov atyndaǵy Ekibastuz MAES-1» JShS-nyń bas dırektory Asan Naýryzǵalıevtiń aıtýynsha, byltyr qazan-qarasha aılarynda qurylys-montaj jumysyna, tehnıkalyq jáne avtorlyq qadaǵalaýǵa kelisimsharttar jasalyp, jaýapty organdardan qurylysty bastaý týraly habarlama alynǵan.
– 2025 jylǵy sáýirde kásiporynda qoldanystaǵy tútin murjasyn tekserý men jóndeý maqsatynda birinshi kezektegi tórt energoblok toqtatylyp, ishki beton qurylymdarynyń qaldyqtary bólshekteldi. Qurylys-montaj jumysyn merdiger uıymdardyń konsorsıýmy júrgizip jatyr. Qazirdiń ózinde jobaǵa 3 mlrd teńge qarjy bólinip, jumysqa 45 adam tartyldy. Al jobaǵa jalpy somasy 29,1 mlrd teńge jumsalady. Jańa tútin murjasy qoldanystaǵy murjanyń janynda salynyp jatyr, – deıdi ol.
Bul elektr energııasyn óndirýdegi shyǵyndardy azaıtyp, energobloktardy toqtatýdy josparly jóndeýmen úılestirýge múmkindik beredi. Nysannyń jobalyq paıdalaný merzimi – 50 jyl. Qurylys aıaqtalǵannan keıin 2027 jyldyń qazanynan 2028 jyldyń shildesine deıin eski tútin murjasyn buzý jumysy josparlanǵan.
Aıtyp ótelik, 2024 jyldyń qarashasynda Ekibastuzdaǵy MAES-1 stansasynda bir energııa blogi kenetten jumysyn toqtatqan edi. Oǵan kásiporyn murjasyndaǵy aqaý sebep bolǵan.
Jalpy, atalǵan kásiporyn Ekibastuz qalasynan 16 shaqyrym jerde ornalasqan. Jobalyq belgilengen elektr qýaty – 4000 MVt. Munda 8 energııa blogi bar, árqaısysy 500 MVt qýatqa ıe. Stansa Ekibastuzdyń kúli joǵary tas kómiri men mazýtty paıdalanady. Kásiporynda biri – 300, ekinshisi 330 metrlik qos alyp murja ornalasqan. Onyń árqaısysy 4 energııa blogine qyzmet etedi. Munda úlken kólemdegi kommýnaldyq jylý óndirmeıdi. Sebebi ol eldi mekenderden alshaq ornalasqan. Keńes zamanynda Ekibastuz qalasyna jylý qubyryn tartý týraly jospar bolǵan. Alaıda joba qymbatqa túsedi dep eseptep, júzege asyrýdan bas tartqan.
KEGOC kompanııasynyń derekterine súıensek, elimizdegi Birtutas elektr energetıkalyq júıe (BEJ) negizgi úsh aımaqtan turady. Elektr stansalardyń, elektr jetkizý jelileri men qosalqy stansalardyń jıyntyǵynan turatyn bul júıede Pavlodar oblysyndaǵy aımaqtyq elektr stansalary aıryqsha mánge ıe. Júıeniń «Soltústik aımaǵyna» Shyǵys Qazaqstan, Abaı, Pavlodar, Aqmola, Qostanaı, Soltústik Qazaqstan, Aqtóbe, Qaraǵandy jáne Ulytaý oblystary enedi. Al «Ońtústik aımaqqa» – Almaty, Jetisý, Jambyl, Túrkistan, Qyzylorda oblystary, «Batys aımaqqa» Batys Qazaqstan, Atyraý, Mańǵystaý oblystary qaraıdy.
Buǵan qarap elimizdegi ónerkásipti aımaqtar men aýyr óndirisi damyǵan óńirler negizinen Ekibastuzdaǵy elektr stansalarynyń qýatyna táýeldi ekenin baıqaýǵa bolar. Onyń ústine otandyq elektr qýatynyń 40 paıyzdan astamy Ertis-Baıan jerinde óndiriledi. Eldegi ulttyq mańyzy bar 8 elektr stansasynyń úsheýi Pavlodar oblysynda ornalasqan (Ekibastuz MAES-1, Ekibastuz MAES-2 jáne «EEK» AQ elektr stansasy). Olardyń belgilengen jıyntyq qýaty — 7035 MVt. Otandyq energııa óndirisiniń besten biri atalǵan kásiporynǵa tıesili.
Pavlodar oblysy