Turning Points – bul The New York Times-tyń flagmandyq serııasy. Onda álemdik sarapshylar, Nobel syılyǵynyń laýreattary, memleket basshylary, pikir kóshbasshylary men oıshyldar jahandyq úrdister men bolashaqty aıqyndaıtyn ózekti syn-qaterlerge taldaýlary men paıymdaryn usynady. KAZMEDIA HOLDING kompanııasy The New York Times Licensing-men atalǵan jýrnaldyń jergilikti nusqasyn shyǵarý jónindegi lısenzııalyq kelisimge 2025 jyly qol jetkizgen, dep habarlaıdy Egemen.kz.
Jýrnal jylyna bir ret jaryq kóredi
Jylyna bir ret qazaq jáne orys tilinde jaryq kóretin Turning Points Qazaqstan basylymynyń bıylǵy – 2026 jylǵa arnalǵan sanynda Tomas Frıdman, Djonatan Haıdt, Nıkolas Krıstof, Djek Torn sııaqty oı kóshbasshylarynyń 2026 jylǵa arnalǵan eksklıýzıvti esseleri jáne Maǵzum Myrzaǵalıev, Saıasat Nurbek, Qýat Akıjanov, Dosym Sátbaev, Arman Evnıev, Jan Muqanov, Almaz Sharman, Raısa Saıran syndy birqatar otandyq avtorlardyń paıymdary men boljamdary jarııalanǵan.
Taqyryptar túrli salany qamtıdy
Atalǵan avtorlardyń kótergen taqyryptary saıasat pen ekonomıkadan bastap, óner men mádenıetke, jasandy ıntelektige deıingi salalardy qamtyǵan. Mysaly, Djonatan Haıd gajdetter men ınternettiń mektep jasyndaǵy balalarǵa zııandy áseri týraly zertteýlerge toqtalsa, Djek Torn jasóspirimder arasynda beleń alǵan yzaqorlyq pen qatygezdiktiń túpki sebepterine úńilgen. Al, Qazaqstan avtorlary óz salalarynda 2026 jyly bolýy múmkin trendter men syn-qaterlerge qatysty paıymdary men boljamdaryn usynǵan.
Jýrnaldyń tanystyrylýy ótedi
KAZMEDIA HOLDING kompanııasynyń habarlaýynsha, jýrnaldyń bas redaktory – belgili jýrnalıst Aıbyn Shaǵalaq.
«Jýrnaldyń alǵashqy sanyn qańtardyń 28-i kúni Astanadaǵy The St. Regis Astana qonaqúıinde ótetin Qazaqstan NEXT 2026 forýmynda resmı tanystyrý josparlanyp otyr», delingen atalǵan kompanııa taratqan habarlamada.
Bir aıta ketetini, jýrnaldyń elektrondy nusqasy The New York Times Licensing saıtynda da qoljetimdi bolady.