Memleket basshysy Qasym-Jomart Toqaev mindetti áleýmettik medısınalyq saqtandyrý týraly zańǵa engizilgen ózgeristerdi resmı bekitip, qujatqa qol qoıǵan edi. Osynyń esesine, bıyldan bastap MÁMS-ten tys qalyp kelgen áleýmettik osal sanattaǵy azamattarǵa saqtandyrý jarnasyn jergilikti ákimdik tóleıdi, dep jazady Egemen.kz.
Búginde halyqtyń 83%-y saqtandyrylǵan bolsa, shamamen 3,3 mln adam MÁMS júıesinen tys qalyp otyr. Endi zańǵa engizilgen ózgeristerdiń nátıjesinde bıyl shamamen 1 mln adam MÁMS júıesimen qosymsha qamtylady. Bul tapsyrma Memleket basshysynyń «Áleýmettik osal sanattarǵa jatatyn azamattar úshin medısınalyq saqtandyrýǵa aýdarymdar jergilikti bıýdjet esebinen tólenýge tıis» degen tapsyrmasynan soń úılesti. Taǵy bir aıtýly jańalyq, endi resmı tirkelgen jumyssyzdar úshin de jarnalar jergilikti bıýdjet esebinen tólenedi.
MÁMS júıesindegi olqylyqtar: Qaıtys bolǵan adam dáriger qabyldaýynda bolǵan
Bul qadam halyqty jumyspen qamtý máselelerinde ákimdikterdiń jaýapkershiligin arttyratyny anyq. Oblys ákimderi jumys oryndaryn ashýǵa, kedeılikti azaıtýǵa, halyqty jumyspen qamtýǵa qatysty belsendi is-sharalar qabyldaýǵa burynǵydan da yntaly bolady. Áıtpese, bıýdjet qarajaty esebinen saqtandyrylatyn azamattar kóbeıse, jergilikti ákimdikke salmaq túsýi múmkin. Mundaı keleńsizdikke kez kelgen óńirdiń ákimi jol bermeýge tyrysady.
Qazirde MÁMS júıesinde qosymsha mindettemelerdiń qosylýyna baılanysty júıeniń qarjylyq júktemesi kúrt óskeni baıqalady. Osyǵan baılanysty memleket tarapynan jarna mólsherlemelerin kezeń-kezeńimen arttyrý usynyldy. Iаǵnı 2027 jyly – 2,2%, 2037 jylǵa deıin 4,7%-ǵa deıin birtindep ósirý mejesi naqtylanǵan. Bul rette jumys berýshiler men jumysshylardyń jarna mólsherlemeleri ózgerissiz qalady. Árıne, bul qadam MÁMS esebinen medısınalyq kómektiń tıimdiligin arttyrýǵa septesedi degen úmittemiz. Eger densaýlyq salasynda qabyldanyp jatqan budan ózge de joba-josparlar ýaqtyly iske assa, medısınaǵa memleketten, MÁMS esebinen bólingen qarjynyń tıimdiligin jurt anyq kóredi.
MÁMS júıesindegi olqylyqtardan keıin qorǵa jańa basshy taǵaıyndaldy