Konstıtýsııalyq komıssııanyń ekinshi otyrysynda Ádilet mınıstri Erlan Sársembaev negizgi zańǵa birqatar ózgeris engizýdi usyndy. Atalǵan ózgerister azamattardan, saıası partııalardan, qoǵamdyq uıymdar men sarapshylardan túsken usynystardy eskere otyryp ázirlendi, dep jazady Egemen.kz.
Atap aıtqanda, Úkimettiń, Konstıtýsııalyq sottyń, prokýratýra jáne sot bıligi organdarynyń jekelegen fýnksııalaryn, quqyq qorǵaý tetikterin, jergilikti ózin-ózi basqarýdy, jekelegen aýmaqtarda arnaıy quqyqtyq rejım belgileý qaǵıdattaryn, sondaı-aq Konstıtýsııaǵa ózgerister men tolyqtyrýlar engizý tártibin reglamentteıtin Konstıtýsııanyń bólimderi men baptaryna ózgerister engizý usynylady.
Túzetýlerdiń jeke blogy bolashaq bir palataly Parlamenttiń – Quryltaıdyń qyzmetine qatysty bolady. Mysaly, tóraǵany taǵaıyndaý, onyń depýtattyq korpýsyn qalyptastyrý tártibi jáne ózge de rásimdik jaǵdaılar aıqyndalady.
Konstıtýsııalyq reforma jónindegi komıssııa otyrysy ótip jatyr
Erlan Sársembaevtyń aıtýynsha, Konstıtýsııaǵa ózgerister men tolyqtyrýlar engizý tártibiniń mańyzdylyǵyn eskere otyryp, tıisti reglamentteýshi normalardy jeke bólimge bólý usynylady.
Úkimet fýnksııalaryn reglamentteýdi ózgertý sheńberinde memlekettik baǵdarlamalardy bekitýdi, sondaı-aq memlekettik komıtetterge qatysty ókilettikterdi alyp tastaý usynylady. Atap aıtqanda, olardyń qyzmetin basqarý, aktileriniń kúshin joıý jáne toqtata turý.
«Memlekettik josparlaýdyń jańa júıesine sáıkes memlekettik baǵdarlamalar atalǵan júıeniń qujattary bolyp sanalmaıdy. Mundaı baǵdarlamalar qajettiligine qaraı ázirlenip, bekitiletin bolady», dep atap ótti Ádilet mınıstri.
Erlan Sársembaev elimizde 2021 jyldan bastap mamandandyrylǵan ákimshilik sottardyń engizilýi quqyq ústemdigi qaǵıdatyn nyǵaıtýdaǵy jáne memleket pen azamat arasyndaǵy naqty teńgerimdi qamtamasyz etýdegi mańyzdy qadam bolǵanyn eske saldy.
Erlan Qarın: Konstıtýsııalyq komıssııanyń qurylýy tarıhı oqıǵa
«Osyǵan baılanysty Konstıtýsııanyń tıisti babynda sot bıligi ákimshilik sot isin júrgizý arqyly júzege asyrylatynyn tikeleı kórsetý usynylady. Bul ákimshilik sottarǵa konstıtýsııalyq-quqyqtyq mártebe beredi, jarııa-quqyqtyq daýlarda azamattardyń quqyqtaryn qorǵaý kepildikterin arttyrady jáne qoǵamnyń sot bıligine senimin nyǵaıtady», dedi ol.
Jalpy Erlan Sársembaevtyń aıtýynsha, engiziletin ózgerister memlekettik júıeniń tıimdiligin kúsheıtedi, ol tek qana jeke tulǵalardyń emes, jarııa bılik ınstıtýttarynyń sapasyna baılanysty bolady.
«Qoǵam úshin bul memlekettiń syrtqy nemese ishki jaǵdaılarǵa qaramastan dáıekti ári quqyqtyq turǵyda áreket etetinine boljamdylyq pen senimdilikti bildiredi. Áleýmettik mindettemeler oryndalyp jatyr, ekonomıkalyq prosester jalǵasyp, halyqaralyq mindettemeler saqtalady», dep qorytyndylady mınıstr.
Artýr Lastaev Konstıtýsııada ómir súrý quqyǵynyń absolıýttik basymdyǵyn bekitýdi usyndy