Úkimette Premer-mınıstrdiń orynbasary – ulttyq ekonomıka mınıstri Serik Jumanǵarınniń tóraǵalyǵymen Salyq kodeksin engizý jobasy keńsesiniń ekinshi otyrysy ótti. Jıynda shaǵyn jáne mıkro bıznesti «taza paraqtan» salyqtyq retteý tetikteri talqylandy, dep jazady Egemen.kz.
Keńes otyrysynda ótpeli kezeńdegi salyqtyq ákimshilendirýge enetin naqty túzetýler qarastyryldy. «Taza paraq» túzetýleri boıynsha shaǵyn jáne mıkro bıznes 2026 jyldyń 1 qańtaryna deıin salyqtyq jáne kameralyq tekserýlerden, sondaı-aq ákimshilik jaýapkershilikten bosatylady. Degenmen, buǵan deıin Memlekettik kirister komıteti resmı arnalar arqyly habarlaǵan birqatar erekshelik saqtalady.
«2025 jylǵy 17 jeltoqsanda Úkimet ótpeli kezeńge salyqtyq ákimshilendirýdi túzetý týraly sheshim qabyldady. Atalǵan sheshimdi júzege asyrý maqsatynda osy jyldyń 1 sáýirine deıin salyq bereshegin tóleýge jatatyn ósimpuldar men aıyppuldardy esepten shyǵarý qaǵıdalary ázirlendi. Kásipkerlik sýbektilerin taratý jáne toqtatý rásimderi qaıta qaraldy. Sondaı-aq shaǵyn jáne mıkro bızneske qatysty keńselik aýdıt júrgizý tásilderine ózgerister engizildi. «Ashyq normatıvtik quqyqtyq aktiler» portalynda tıisti normatıvtik quqyqtyq aktilerdiń jobalary ornalastyryldy jáne aqpan aıynyń basynda qabyldanady dep josparlanyp otyr», dedi Memlekettik kirister komıteti tóraǵasynyń orynbasary Jánibek Nurjanov. Mıkro jáne shaǵyn bıznes salyqtyq ákimshilendirýdi «taza paraqtan» bastaıdy2026 jylǵa deıin qosylǵan qun salyǵy (QQS) boıynsha esepke qoıýǵa baılanysty buzýshylyqtar neigizinde ákimshilik ister qozǵalmaıtyny, al buryn memlekettik kirister organdary shyǵarǵan ister toqtatylatyny aıtyldy. Bul sharalar bıznestiń salyqtyq ákimshilendirýdiń jańa sharttaryna barynsha qolaıly ótýin qamtamasyz etýge baǵyttalǵan.
Otyrys qorytyndysy boıynsha Memlekettik kirister komıteti men «Atameken» Ulttyq kásipkerler palatasy kásipkerlerdiń qatysýymen normatıvtik standarttardy «taza paraqtan» bastap qoldaný tájirıbesin túsindirý maqsatynda keńeıtilgen keńes ótkizýge kelisti.
Úkimettiń baspasóz qyzmetiniń málimetinshe, ótken aptada Memlekettik kirister komıtetine call-ortalyǵy men Salykbot Telegram boty arqyly – 19 400, Ulttyq ekonomıka mınıstrligine – 50, «Atameken» Ulttyq kásipkerler palatasyna – 14 ótinish kelip túsken.
Kásipkerlerdi kóbinese salyq rejımin tańdaý, salyq tóleýshiniń shotynda jumys isteý, elektrondy shot-faktýralardy shyǵarý, qazirgi prosedýralyq máseleler qyzyqtyratyny belgili bolyp otyr. Mundaı ótinishter boıynsha túsiniktemeler dereý berilgen.
Júıeli júrgizilgen aqparattyq-túsindirý jumystarynyń nátıjesinde Memlekettik kirister komıtetine qarasty call-ortalyqtyń júktemesi tómendegen. Buryn kúnine 5500-ge jýyq qońyraý tússe, qazir kúnine 4700-ge jýyq qońyraý túsedi.
Ulttyq ekonomıka mınıstrligi men «Atameken» Ulttyq kásipkerler palatasynda júıeli máseleler jınaqtalǵan. Olardyń qatarynda uzaqmerzimdi kelisimsharttar boıynsha QQS mólsherlemelerin qoldaný, MIB-ke salyq salý, múgedekterdi jumysqa alatyn uıymdarǵa salyq salý sharttary, medısına salasynda ártúrli QQS stavkalary men jeńildikterdi qoldaný, sondaı-aq, ózin-ózi jumyspen qamtyǵandar úshin qyzmet túrleriniń tizbesin keńeıtý jatady.
QQS: Qandaı medısınalyq qyzmetter salyqtan bosatylady?Osyndaı úndeýlerdiń bir mysalyn «Atameken» Ulttyq kásipkerler palatasy tóraǵasynyń orynbasary Tımýr Járkenov keltirdi. Másele medısına salasyndaǵy QQS boıynsha jeńildikterdi joıýǵa qatysty. Salyq kodeksine sáıkes, dárilik zattardy ótkizý jáne ımporttaý boıynsha QQS bosatý tek tegin medısınalyq kómek kórsetý men mindetti medısınalyq saqtandyrý memlekettik qory, sondaı-aq áleýmettik mańyzy bar jáne orfandyq aýrýlardy emdeý qyzmetinde ǵana saqtalady. Bul rette kommersııalyq segmentte satylatyn dárilik zattarǵa, medısınalyq maqsattaǵy buıymdarǵa, sondaı-aq olardy óndirýge arnalǵan materıaldar men komponentterge 2026 jyldan bastap 5% jáne odan ári 10% stavka boıynsha QQS salynady. Bul bıznes ókilderiniń pikirinshe, tutynýshylar úshin shyǵyndardyń ósýine ákelýi múmkin. Sonymen qatar belgilengen shekti baǵalar boıynsha kommersııalyq segmentte dárilik zattar men medısınalyq maqsattaǵy buıymdar tapshylyǵynyń táýekelderi, sondaı-aq farmasevtıkalyq sýbstansııalar, dári-dármekter men medısınalyq maqsattaǵy buıymdar óndirýge arnalǵan jabdyqtardy ótkizý jáne ımporttaý boıynsha aınalymdarǵa 16% bazalyq mólsherleme boıynsha QQS salynatyny qosymsha atap ótildi.
Salyq júıesi «taza paraqtan» qaıta qurylady
Serik Jumanǵarın salyq organdarynyń aqparattyq júıelerin paıdalaný boıynsha aýqymdy túsindirý jumystaryn júrgizý qajet ekenin aıtty. Sıfrlyq qyzmetterdiń belsendi damýy kezinde barlyq paıdalanýshynyń ózgeristerge beıimdelýge ýaqyty bola bermeıtini atap ótildi. Osyǵan baılanysty naqty oqytý algorıtmin, onyń ishinde sıfrlyq kómekshilerdi paıdalaný, sondaı-aq bıznespen turaqty keri baılanysty qamtamasyz etý qajet.