Aqpannyń 6-sy kúni Italııanyń qos qalasy – Mılan jáne Kortına-d'Ampessoda tórtjyldyqtyń basty básekesi qysqy Olımpıada oıyndary bastalady. Dúnıe júziniń eń myqty sportshylary baq synaıtyn aq oıyndarda el namysyn 10 sport túri boıynsha 36 sportshy qorǵaıdy. Qazaqstan tuńǵysh ret 1924 jyly Fransııanyń Shamonı qalasynda ótken qysqy Olımpıadadan keıin araǵa 70 jyl salyp, 1994 jyly jyly básekege alǵash ret táýelsiz el retinde qatysty, dep jazady Egemen.kz.
Qysqy Olımpıada oıyndarynyń bastaý alýyna «Soltústik oıyndary» túrtki boldy. Shvesııa astanasy Stokgolm qalasynda 1901-1926 jyldar aralyǵynda Eýropa memleketteriniń basyn qosqan shaǵyn saıystar ótip turǵan. Keıinnen aýqymy keńeıgen saıys 1924 jyly aq Olımpaıadaǵa ulasty. Osy jyly Fransııanyń Shamonı qalasynda qysqy sport túrleri boıynsha Olımpıadalyq týrnır uıymdastyryldy. Dúbirli dodanyń jarys jolyna sporttyń segiz túri boıynsha 16 memleket ókilderi qosyldy.
Bul elder qatarynda Iýgoslavııa koroldigi, Italııa, Vengrııa, Latvııa jáne Estonııa bar edi. Al KSRO sportshylary aq oıyndardyń júldesine 1946 jyldan bastap talasty.
Bastapqyda qysqy oıyndar jazǵy oıyndardyń jalǵasy retinde bir jyly ótkizilip otyrǵan. Tek 1994 jyldan bastap Qysqy Olımpıada oıyndary jazǵy oıyndardan soń, eki jyldan keıin uıymdastyrylyp júr.
Prezıdent qysqy Olımpıadaǵa qatysatyn ulttyq qurama múshelerine Memlekettik týdy tapsyrdy
Aq Olımpıada: Qazaqstan quramasynyń tabysy men toqyraýyBıyl otandastarymyz el tarıhyndaǵy toǵyzynshy qysqy Olımpıadada óner kórsetedi.
Jerlesterimiz 1994 jyly Norvegııanyń Lıllehamer qalasynda ótken qysqy Olımpıadaǵa tuńǵysh ret qatysyp, bir altyn jáne eki kúmis medaldi qanjyǵalady. Osylaısha, elimiz jalpykomandalyq esepte 12-orynǵa taban tiredi. Úsh júldeni de el qorjynyna shańǵyshy Vladımır Smırnov saldy. Atalǵan Olımpıadada el atynan 29 sportshy sporttyń segiz túrinen baq synaǵan edi.
Araǵa tórt jyl salyp sportshylarymyz Japonııanyń Nagano qalasynda ótken Aq Olımpıadaǵa attandy. Baıraqty básekede 60 sportshynyń ishinde taǵy da shańǵyshy Vladımır Smırnov daralanyp, el qorjynyna qola júlde saldy. Sol saıysta buıyrǵan ekinshi qolany konkımen júgirý sportynyń ókili Lıýdmıla Prokasheva ıelendi. Qolany qanaǵat tutqan qurama bul joly týrnırlik kesteniń 20-shy satysyna jaıǵasty.
2002 jáne 2006 jylǵy qysqy Olımpıada AQSh-tyń Solt-Leık-Sıtı jáne Italııanyń Týrın qalasynda ótti. Muhıttyń arǵy betindegi oıyndarǵa Qazaqstan quramasynan 52 sportshy, Týrındegi básekege 43 sportshy qatysty. О́kinishke qaraı, eki Olımpıadada da el sporshylary jeńis tuǵyrynan kórine almady.
2010 jyly Kanadanyń Vankýver qalasynda jalaýy jelbiregen aq Olımpıadada 37 sportshymyz baq synap, bir kúmis júlde ǵana buıyrdy. Jalǵyz júldeni bıatlon básekesinde óner kórsetken Elena Hrýstaleva jekeleı saıysta enshiledi.
Qazaqstan telearnalary qysqy Olımpıada oıyndaryn tikeleı efırde kórsetedi
2014 jyly Reseıdiń Sochı qalasynda ótken jahandyq jarysta da jalǵyz medal qolǵa tústi. Olımpıadanyń sońǵy kúnderinde muz aıdynǵa shyqqan mánerlep syrǵanaýshy Denıs Ten úshinshi tuǵyrdan kórinip, elimizge qola medal syılap qýantty. Bul olımpıadaǵa jalpy sany 51 sportshy attanǵan edi
2018 jylǵy Olımpıada Koreıa Respýblıkasynyń Phıonchhan qalasynda uıymdastyrylyp, jarysqa Qazaqstan quramasy sapynan 44 sportshy qatysty. Bul Olımpıadada Qazaqstan quramasynyń qorjyny bos qaıtqan joq. Frıstaıl-mogýl ókili Iýlııa Galysheva 77,40 upaı jınap, Phıonchhan Olımpıadasynyń qola júldegeri atandy.
Al 2022 jyly aq Olımpıada alaýy Qytaıdyń Beıjiń qalasynda tutandy. Bul dodaǵa Qazaqstan quramasynan 34 sportshy (17 er, 17 áıel) qatysty. Buǵan deıingi Solt-Leık-Sıtı (AQSh) jáne Týrın (Italııa) Olımpıadalary sekildi, bul básekede de otandastarymyz júldesiz qaldy. Degenmen, short-trekshi Abzal Ájǵalıev tórtinshi satyǵa taban tirep, júldege bir qadam jetpeı toqtady. Sondaı-aq aralas estafetadaǵy otandyq short-trek komandasy Abzal Ájǵalıev, Denıs Nıkısha, Olga Tıhonova, Iаna Han besinshi orynnan kórindi.
Búginde Qazaqstanda qysqy olımpıadalyq sporttyń 13 túri damyp keledi. Elde qysqy sportpen 139 myńǵa jýyq adam shuǵyldanady. 1 838 jattyqtyrýshy jumys isteıdi. Qysqy sport ınfraqurylymyn damytý jáne kadr daıarlaý jumystary Jambyl oblysynan basqa barlyq óńirde júrgizilip otyr.
Mılan jáne Kortına-d'Ampesso – 2026: El quramasynyń ereksheligi qandaı?Bıylǵy Olımpıadanyń basty ereksheligi – genderlik teńgerimniń saqtalýy. Ulttyq qurama sapynda tájirıbeli sportshylarmen qatar, Olımpıadada alǵash ret baq synaıtyn debıýtanttar da bar. Atap aıtqanda, 18 sportshy Mılan jáne Kortına-d'Ampessodaǵy Olımpıada oıyndarynda tuńǵysh ret baq synaıdy. Jalpy 36 otandasymyz sporttyń 10 túrinen júldege talasady.
El sportshylary qysqy Olımpıada oıyndarynda qandaı kıim úlgisimen óner kórsetedi?
Al 2018 jylǵy Olımpıadanyń júldegeri Iýlııa Galysheva sporttyq mansabyndaǵy besinshi Olımpıadasyn ótkizedi. Al short-trek sheberleri Abzal Ájǵalıev pen Denıs Nıkısha Olımpıada oıyndaryna tórtinshi ret qatysady. Sondaı-aq komanda quramynda álem chempıonattarynyń júldegerleri Mıhaıl Shaıdorov pen Anastasııa Gorodko bar.
Ulttyq quramanyń eń jas múshesi – 16 jastaǵy Asan Asylhan. Ol 15 jasynda Frıstaıl-akrobatıkadan Harbınde ótken Azııa oıyndarynda kúmis medal enshiledi. Olımpıadaǵa deıingi irikteý týrnırlerinde sátti óner kórsetip, mansabyndaǵy alǵashqy aq Olımpıadada júldege talasady.