Turǵyndarynyń sany shamamen elý myńǵa jýyqtaıtyn Talǵar qalasynda tórt jyldan beri salynyp jatqan magıstraldyq sý taratqyshynyń qurylysy áli kúnge deıin aıaqtalmaı keledi.
Qazir nysanda qurylys jumystary toqtap tur, buǵan qarjynyń jetispeýi sebep. Sonyń saldarynan qaladaǵy sý júıesine túsetin júkteme jyl saıyn artyp, ásirese jaz mezgilinde sý tapshylyǵyn aıqyn sezinemiz deıdi óńir turǵyndary.
«Jazda jaǵdaı tipti qıyndaıdy. Ásirese 9 qabatty úılerdiń joǵarǵy qabattaryna sý múlde kóterilmeıdi, qysym joq. Keı kezderi krandy ashyp qoıamyz, sý aqpaıdy, sóıtip sýǵa jarymaı, tańdaı kebersıtin kúnder bolady. Keńdala men Aqdala aýylyndaǵy saıajaılardyń jaǵdaıy odan da qıyn. Qala kún saıyn ósip jatyr, al sý júıesi baıaǵy qaz-qalpynda. Shynymyzdy aıtsaq, jyl saıyn aıtylǵanmen, sheshim tappaıtyn bul máseleden ábden sharshadyq. Endi osy sý taratqyshtyń tezirek bitip, iske qosylýyn asyǵa kútemiz. Basqa úmit qalmady», deıdi qala turǵyny Ahat Soltanqulov
Magıstraldyq sý taratqysh – Talǵar qalasyna sý jetkizetin negizgi júıe. Bul joba iske qosylǵan jaǵdaıda, eski qubyrlar men tozǵan ınfraqurylymǵa túsetin júkteme azaıyp, qala turaqty ári jetkilikti kólemde aýyzsýmen qamtylýǵa tıis. Alaıda qurylys tolyq aıaqtalmaǵandyqtan qala áli de burynǵy júıege táýeldi bolyp otyr.
Almaty oblysyna issaparmen kelgen Májilis depýtattary Maksım Rojın men Danııar Qasqaraýov Talǵar qalasyna arnaıy at basyn buryp, máseleniń mánisimen tanysty.
«Qazir Talǵar qalasynda bar bolǵany 4 300 tekshe metrlik rezervýarlyq qýat jumys istep tur. Bul, ásirese jaz mezgilinde qala úshin jetkiliksiz. Al jańa júıe tolyq iske qosylǵan jaǵdaıda qosymsha 7 600 tekshe metrge deıin sý jetkizýge múmkindik bolady. Joba aıasynda tórt rezervýar salynǵanymen, sý sapasyn baqylaýǵa arnalǵan zerthana jarty jolda toqtap qalǵan. Onyń ishindegi negizgi jabdyqtar áli ornatylmaǵan. Sebebi oǵan qarjy bólingen joq», M.Rojın.
Atalǵan jobanyń jalpy quny 4,6 mlrd teńgeni quraıdy. Alaıda qurylysty tolyq aıaqtaýǵa qajet shamamen 1,7 mlrd teńge áli bıýdjetten bólinbegen. Bul qarajatqa sýdy hlorlaıtyn jabdyqtar, zerthanalyq quraldar jáne negizgi tehnologııalyq qurylǵylar satyp alynýǵa tıis. Qarjy túspegendikten, osy jabdyqtar alynbaı, qurylys jumystary toqtap tur.
Májilis depýtattary Talǵardaǵy magıstraldyq sý taratqyshty baqylaýǵa alatyndaryn málimdedi. Olar jetpeı turǵan qarjyny bıýdjetten tolyq ári ýaqytynda bóldirý úshin jaýapty memlekettik organdarmen naqty jumys júrgiziletinin aıtty. Sondaı-aq bul nysandy áleýmettik mańyzy bar strategııalyq joba retinde belgilengen merzimde aıaqtaýdy basty maqsat etip otyr. Atalǵan joba tolyq iske asqan jaǵdaıda, shamamen 50 myńǵa jýyq turǵyn ortalyqtandyrylǵan, turaqty ári sapaly aýyzsýmen qamtylatyn bolady.
Almaty oblysy,
Talǵar aýdany