Memlekettik arnaýly qordyń qarajaty esebinen salynǵan nysan «№1 Semeı arnaýly áleýmettik qyzmetter kórsetý ortalyǵy» mekemesiniń aýmaǵynda boı kóterdi, dep jazady Egemen.kz.
Atalǵan ortalyqta 18 jastan asqan, psıhonevrologııalyq aýrýlary bar, I jáne II toptaǵy múgedektigi bar 400 qyzmet alýshyǵa stasıonarlyq jaǵdaıda arnaýly áleýmettik qyzmet kórsetiledi. Onda 1964 jáne 1970 jyldary salynǵan eki korpýs bar. Jańa qosymsha korpýstyń jalpy aýmaǵy 6 281,8 sharshy metrdi quraıdy. Nysan halyqty áleýmettik qorǵaý salasyndaǵy arnaýly áleýmettik qyzmetter kórsetý standarttaryna tolyq sáıkes keledi. Ǵımaratta eńbek sheberhanasy, medısınalyq kabınetter, zamanaýı ashana, shashtaraz bólmesi, kitaphana jáne jatyn bólmeleri bar.
Jańa ǵımarattyń ashylý saltanatyna oblys ákimi Berik Ýálı, oblys prokýrory Erlan Abaev qatysty. Aımaq basshysy jańa nysannyń áleýmettik mańyzyna toqtalyp, mekeme erekshe kútimdi qajet etetin azamattar úshin qolaıly ári qaýipsiz orta qalyptastyrýǵa baǵyttalǵanyn aıtty.
«Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýynda «Memleket ár azamattyń laıyqty tabys taýyp, sapaly áleýmettik qyzmet alyp, erteńgi kúnine senimdi bolýy úshin barynsha jaǵdaı jasaı beredi» dep áleýmettik salanyń mańyzyn aıryqsha atap ótken bolatyn. Jańa ǵımaratty paıdalanýǵa berý halyqty áleýmettik qorǵaý salasynda arnaýly áleýmettik qyzmetter kórsetý standarttaryna tolyq sáıkes, bir adamǵa 5 sharshy metrge deıingi turǵyn úı alańymen qyzmet alýshylardy qamtamasyz etýge múmkindik beredi. Sonymen qatar, qosymsha korpýs sanıtarııalyq-gıgıenalyq jáne epıdemııaǵa qarsy talaptardyń saqtalýyn qamtamasyz etedi. Sondaı-aq, qyzmet alýshylardyń turýy úshin de, ortalyq personalynyń jumysy úshin de neǵurlym qolaıly jaǵdaılar jasaıdy, medısınalyq jáne áleýmettik qyzmet kórsetý sapasyn arttyrady. Oblysymyzda qaıtarylǵan aktıvter esebinen 25 nysannyń qurylysy bastalǵan bolatyn. Qazirgi tańda úsheýiniń qurylysy aıaqtaldy. 22 nysannyń qurylysy júrgizilip jatyr. Jalpy 22 mıllıard teńge qarjy qarastyryldy. Osy ıgi ispen aınalysqan prokýratýra, quqyq qorǵaý organdary qyzmetkerlerine Abaı oblysy jurtshylyǵy atynan alǵysymyzdy bildiremiz», dedi oblys ákimi.
Abaı oblysynda ashylǵan jańa zaýyttyń ereksheligi nede?
Ákimdiktiń dereginshe, nysan iske qosylǵannan keıin jańa jumys oryndary ashylyp, óńirdegi áleýmettik qoldaýǵa muqtaj azamattarǵa sapaly qyzmet kórsetiledi. Qazirgi tańda oblys boıynsha mundaı qyzmetke 101 adam kezekte tur. О́ńirde 23 800 múgedektigi bar adam turady. 2026 jyly aımaqtaǵy 15 myńnan astam múgedektigi bar jandardy tehnıkalyq ońaltý quraldarymen jáne ońaltý qyzmetterimen qamtamasyz etý maqsatynda 3,3 mlrd teńge bólindi.
Sonymen qatar, áleýmettik jáne kólik ınfraqurylymy obektileriniń qoljetimdiligin qamtamasyz etý maqsatynda bıyl 200 nysandy beıimdeýden ótkizý josparlanyp otyr. Oblysta arnaýly áleýmettik qyzmettermen 6 myńǵa jýyq adam qamtylǵan.
«Memleket basshysynyń tapsyrmasyn oryndaý maqsatynda Úrjar balalarǵa arnalǵan arnaýly áleýmettik qyzmet kórsetý ortalyǵynyń janynda salynǵan qosymsha ǵımarattyń qurylysy aıaqtalyp, bıyl paıdalanýǵa beriledi. Sondaı-aq, Borodýlıha aýdanynda jáne Semeı qalasynda ornalasqan qarttar úıine aǵymdaǵy jóndeý jumystary jasalady. Áleýmettik mekemelerdiń qyzmetin arttyrý maqsatynda 20 avtokólikti (onyń ishinde 7 ınvataksı) lızıng arqyly satyp alý josparlanyp otyr», deıdi oblys ákiminiń baspasóz qyzmeti.
Abaı oblysynda 500 balaǵa arnalǵan Oqýshylar saraıy ashyldy