Konstıtýsııalyq komıssııa músheleri Qazaqstan Respýblıkasy Ata zańynyń negizgi bólimderine túzetýlerdi daıyndaý boıynsha aýqymdy jumys atqardy. Atap aıtqanda, el Parlamentiniń ókilettikteri men rásimderine aıtarlyqtaı revızııa júrgizildi. Bul týraly Konstıtýsııalyq sot tóraǵasynyń orynbasary Baqyt Nurmuhanov málimdedi, dep jazady Egemen.kz.
«Prezıdent» bóliminiń erejeleri tujyrymdamalyq turǵydan qaıta qaraldy. Atap aıtqanda, prezıdenttik saılaý men ant berý rásiminiń merzimi, Memleket basshysynyń Quryltaımen, Úkimetpen jáne basqa da memlekettik organdarmen ózara is-qımyly aıasyndaǵy ókilettikteri, sondaı-aq kadr máseleleri men norma shyǵarý fýnksııalary qarastyryldy.
«Bólimge Vıse-prezıdenttiń quqyqtyq mártebesi men ókilettikterine arnalǵan jańa bap engizildi», dedi Baqyt Nurmuhanov.
Onyń aıtýynsha, bir palataly Parlamentke kóshý aıasynda «Quryltaı» bólimine keń aýqymdy túzetýler jobasy daıyndaldy. Atap aıtqanda, eki palataly Parlament jáne onyń osyndaı júıedegi qyzmeti týraly erejeler alynyp tastaldy.
«Zań shyǵarýshy organnyń ókilettikteri muqııat qaıta qaraldy. Quryltaıdyń sessııalary men qyzmetin uıymdastyrýǵa qatysty barlyq bap jańartyldy. Zań shyǵarý bastamasy quqyǵy bar sýbektilerdiń tizimi keńeıtildi. Quryltaı qabyldaǵan zańdarmen retteletin negizgi qoǵamdyq qatynastardyń tizimi keńeıtildi. Zań jobalaryn qaraý jáne qabyldaý rásimderin retteıtin erejeler qaıta qaraldy», dedi Konstıtýsııalyq sot tóraǵasynyń orynbasary. Marat Bashımov: Jeke derekterdi qorǵaý Konstıtýsııada bekitilýi tıis Baqyt Nurmuhanov atap ótkendeı, respýblıka azamattary arasynan qurylǵan Qazaqstan Halyq keńesine qatysty erejeler jeke bólimde toptastyrylǵan. Sondaı-aq, jańa joǵary keńes organy Qazaqstan halqynyń múddelerin bildirý jáne zań shyǵarý bastamasy quqyǵyna ıe bolatyny bekitiledi.Sonymen qatar, salalyq konstıtýsııalyq zańda kórsetilgen Konstıtýsııalyq sottyń quqyqtyq mártebesi týraly erejeler de Konstıtýsııa jobasyna engizildi.
«Konstıtýsııalyq qadaǵalaýdy júzege asyratyn jáne búkil el boıynsha Konstıtýsııanyń ústemdigin qamtamasyz etetin táýelsiz memlekettik organ retindegi mártebesin bekitedi», dep atap ótti Baqyt Nurmuhanov. Sóz sońynda ol Konstıtýsııalyq sot sheshimderiniń quqyqtyq saldary da naqty aıqyndalatynyn aıtty. Aıta keteıik, Konstıtýsııalyq reformalar jónindegi komıssııanyń kezekti otyrysynda Ata zań mátininiń 84%-y men preambýlasy tolyq jańartylatyny málim boldy.