ASTANA. 25 naýryz. Fransýz Alpi taýlarynyń etegine soǵyp, qıraǵan nemistiń Germanwings kompanııasynyń A320 laıneriniń bortynda úsh qazaqstandyq azamattyń qaza tapqany belgili bolyp otyr. Bul týraly Qazaqstan Syrtqy ister mınıstrliginiń baspasóz qyzmetiniń deregine súıengen egemen.kz habarlady.
«Fransııanyń ońtústiginde apatqa ushyraǵan A320 nómirli Airbus bortynda qazaqstandyq úsh azamat bolǵan», - delingen vedomstvo baspasóz qyzmeti taratqan paraqshada.
Qazaqstan Syrtqy ister mınıstrligi 24 naýryz kúni fransýz Alpi taýlarynyń etegine soǵyp, apatqa ushyraǵan Germanwings avıakompanııasynyń bortynda Qazaqstan Respýblıkasynyń Imanǵalıev Erbol Bazaralyuly (1965 jyly týǵan), Esenǵalıeva Aıjan Sarymqyzy (1966 jyly týǵan) jáne Imanǵalıev Ádil Erboluly (1989 jyly týǵan) esimdi azamattarynyń qaza tapqanyn málimdep otyr.
Aty-jónderine qaraǵanda, úsheýi bir otbasynyń músheleri sııaqty.
«Qaza tapqandardyń otbasysy men týǵan-týystaryna qatty qaıǵyryp, kóńil aıtamyz. Budan basqa, Germanııa bıliginiń aqpary boıynsha, Qazaqstan azamaty bolýy yqtımal Bles Elena nyspyly áıel de bolǵan. Qazirgi tańda tıisti organdar bul aqpardyń qanshalyqty shyndyqqa janasymdy ekenin tekserip jatyr», - delingen habarlamada.
Syrtqy ister mınıstrligi sondaı-aq qaza tapqandar týǵan-týystarynyń Qazaqstan Respýblıkasynyń Berlındegi konsýldyǵynyń «qyzý jelidegi» +4915208833631 (negizgi baılanys), Qazaqstan Respýblıkasynyń Ispanııadaǵy (Barselona) konsýldyǵynyń +34674482333) nómirine habarlasýlary kerek ekenin túsindiredi. Budan bólek, konsýldarmen habarlasý múmkin bolmaı qalǵan jaǵdaıda týǵan-týystardyń Syrtqy ister mınıstrligindegi kezekshi dıplomattyń +77172720111 degen telefon nómirine habarlasýlaryna bolatyndaryn eskertedi.
Lufthansa-nyń enshiles kásiporny bolyp tabylatyn Germanwings avıakompanııasynyń A320 nómirli Airbus áýe kemesi 24 naýryz kúni Barselonadan ushyp shyqqanyna bir saǵattaı ýaqyt bolǵan kezde kenetten bara jatqan bıiktiginen kúrt tómen túsip, fransýzdyń Alpi taýlarynyń etegine soqqan. Sonyń aldynda pılottar qaýip dabylyn qaǵa salyp, baılanystan shyǵyp qalǵan. Osy eki ortada bar bolǵany 8 mınýt qana ýaqyt ótken. Aldyn ala boljam boıynsha, bortta 154 adam otyrǵan, olardyń 6-y ekıpaj músheleri bolǵan.
Sondaı-aq qıraǵan ushaqta Qazaqstannyń týmasy, keńes zamanynan bergi opera ánshisi Oleg Bryjaktyń bolǵany budan buryn habarlanǵan bolatyn.
Murat Aıtqoja.