ASTANA. 25 naýryz. Joǵary hokkeı lıgasynda el namysyn qorǵaıtyn Qaraǵandynyń «Saryarqasy» jarystyń jartylaı fınalyna shyqty. Shırek fınaldyń jetinshi oıynynda bizdiń komanda Angarskiniń «Ermagyn» 4:0 esebimen jeńdi. Bul týraly egemen.kz habarlady.
Qos komanda arasyndaǵy sheshýshi oıyn Qaraǵandyda ótti. Matchtyń 2-mınýtynda aıdyn ıeleri sapynan bir oıynshy kishi aıyppen jazalandy. Desek te, «Ermak» hokkeıshileri bul múmkindikti paıdalana almady. Qaıta, aıdynda tórt oıynshymen júrip-aq «Saryarqa» esep ashatyn múmkindik tapty. Shaıbanyń avtory – Evgenıı Rymarev. Alǵashqy úziliske deıin taǵy bir shaıba soqqan qaraǵandylyqtar esepti 2:0-ge jetkizdi. Bul joly Mıhaıl Panshın mergendigimen kózge tústi.
Ekinshi kezeńde jankúıerler gol kóre almady. Al sońǵy kezeńde «Saryarqa» taǵy eki márte qarsylastaryn qapy qaldyrdy. Kezdesýdiń 52 jáne 54-mınýttarynda gol soqqan Denıs Stasıýk bolatyn.
Oıynnyń qalǵan bóliginde esep ózgermeı, Qaraǵandynyń komandasy iri eseppen jeńiske jetti. Nátıjesinde, qos komanda arasyndaǵy jalpy esep bizdiń paıdamyzǵa 4:3 boldy.
Endi «Saryarqa» jartylaı fınalda Neftekamskiniń «Torosymen» kúsh synasady. Tórt jeńiske deıin jalǵasatyn serııanyń alǵashqy eki oıyny 28-29 naýryzda Qaraǵandyda ótedi. Eger kezdesý taǵdyry jetinshi oıynda sheshiler bolsa, atalǵan matchty «Saryarqa» óz alańynda ótkizedi. Mundaı basymdyqqa Leonıd Tambıevtiń shákirtteri maýsym barysynda kórsetken nátıjesiniń esebinen ıe bolyp otyr. Jartylaı fınaldyń kelesi jubyn Ijevskiniń «Ijstali» men Tverdiń THK komandalary qurady.
Aıta keteıik, eger «Saryarqa» bıylǵy maýsymda da fınalǵa shyǵar bolsa, «Bratına» kýbogy úshin ótken saıystyń sheshýshi básekesinde qatarynan úsh ret oınaýǵa múmkindik alady. Atalǵan kýboktyń qazirgi ıegerleri Qaraǵandynyń komandasy ekeni belgili.
Elaman Qońyr.
Derek: egemen.kz.
Sýret: hc-saryarka.com.