...ortalyq ashylyp, kólikter tapsyryldy
О́ndiristi óńirde jumys saparymen bolǵan Tótenshe jaǵdaılar mınıstri V.K.Bojko osy býynnyń oblystyq qurylymy jumysymen tanysty. TJM janynan qurylǵan daǵdarystyq ortalyqtyń ashylýyna qatysty. Apatty tosyn oqıǵalar bola qalǵan jaǵdaıda barlyq is-sharalar jedel osydan basqarylady. Ortalyq osy zamanǵa baılanys quraldarynyń sońǵy úlgilerimen jabdyqtalǵan. Munyń ózi tótenshe jaǵdaılar saldarlaryn tez joıýǵa múmkindik beredi.
Mınıstr “Kómir” áskerılendirilgen qutqarý qyzmetimen tanysty. Shahtalardaǵy apattar kezinde kenshilerdi qutqarý jumystarymen shuǵyldanatyn bul qyzmetti jetildirý joldary talqylandy. Sońynan atalǵan qurylymnyń qalalyq jáne aýdandyq bólimshelerine arnaıy jabdyqtalǵan kólikter tapsyryldy.
Aıqyn NESIPBAI,QARAǴANDY.
...qala turǵyndary Germanııany tamashalady
Qostanaıdaǵy Kórkemsýret galereıasynda “Qazirgi Germanııa” atty jyljymaly kórme ashyldy. Germanııanyń Qazaqstandaǵy jylyna arnalǵan bul shara qostanaılyqtarǵa Eýropadaǵy aldyńǵy qatarly el týraly mol málimet beredi. Kórmeniń ashylý saltanatynda sóz alǵan oblys ákiminiń orynbasary Vıktor Meıestr eki el qarym-qatynasynda mundaı sharanyń mańyzdy ekenin aıtty.
– Germanııa – óndirisiniń damýy jaǵynan álemde jetekshi oryn alatyn elderdiń biri. Bizdiń odan úırenerimiz kóp. Al myna kórmedegi eldiń qýatty ekonomıkasy men áleýmettik turmysy, mádenıeti men bilimi týraly málimetter qostanaılyqtardyń Germanııa týraly jaqynyraq bilýine múmkindik beredi, – dedi Vıktor Vıktorovıch.
Kórmege kelýshiler belgili nemis fotosýretshisi Torsten Elger túsirgen kompozısııalardan Berlın men Frankfýrt qalalarynyń túngi kórinisterin, eldiń basqa da kórikti jerlerin tamashalady. Sonymen qatar, osy kórme Germanııa men Qazaqstan arasyndaǵy ekonomıkalyq jáne mádenı baılanystar týraly da mol habardar etti.
Germanııanyń Qazaqstandaǵy elshiligi uıymdastyrǵan bul kóshpeli kórme elimizdiń basqa oblystaryn da aralaıtyn bolady.
Názıra JÁRIMBETOVA, QOSTANAI.
...aksııa sheńberinde semınar-keńes ótti
Respýblıkalyq “Birligimiz jarasqan” aksııasy sheńberinde Taldyqorǵanda oblystyq Qazaqstan isker áıelderi assosıasııasynyń uıymdastyrýymen bıznesti jańa bastaǵan kásipkerlerdi qoldaý maqsatynda “О́z bıznesimizdi qalaı ashamyz” degen taqyrypta semınar-keńes ótkizildi.
Keńeske “Halyq Banki” men “Alıans Bankiniń” ókilderi qatysyp, jas kásipkerlerge beriletin nesıeni alý joldary, qarjylandyrý maqsatynda qurylǵan “Damý” baǵdarlamasy aıasyndaǵy qoldaý jaıly egjeı-tegjeıli túsindirdi. Jeke kásipkerlerdiń suraqtaryna jaýap berilip, qandaı da bir qıyndyq týyndaǵanda “Atameken” odaǵy men qalalyq jáne oblystyq orta jáne shaǵyn kásipkerlikti damytýmen aınalysatyn sala mamandarynan keńes alýǵa bolatyny atap kórsetildi. Kásibinen násibin tabýdy kózdegenderge bul kezdesýdiń mańyzy zor ekendigi baıqaldy.
Kúmisjan BAIJAN, Almaty oblysy.