Jambyl atyndaǵy qalalyq jasóspirimder kitaphanasy janynan jańa mádenı-bilim berý ortalyǵy ashyldy. Bilim men ınnovasııaǵa umtylǵan qala turǵyndaryn biriktiretin alań zamanaýı tehnologııany meńgerý múmkindigin keńeıtýge, halyqaralyq bilim berý yntymaqtastyǵyn nyǵaıtýǵa baǵyttalǵan.
Megapolıstegi shyǵarmashylyqpen aınalysatyn jastardy qoldaýǵa arnalǵan ortalyq qala ákimdiginiń, AQSh elshiligi men AQSh-tyń Almatydaǵy Bas konsýldyǵynyń, sondaı-aq jergilikti seriktes uıymdardyń qoldaýymen esik ashyp otyr. Innovasııa men tájirıbeni ushtastyrǵan zamanaýı kópfýnksıonaldy alańda AQSh ýnıversıtetterinde bilim alýǵa qyzyǵýshylyq tanytqan jastarǵa keńes berý, aǵylshyn tili kýrstary men sóıleý klýbtary, kásibı jáne sıfrlyq daǵdyny damytýǵa arnalǵan vorkshoptar, sondaı-aq kásipkerlik, kóshbasshylyq jáne azamattyq belsendilik baǵytyndaǵy baǵdarlamalar iske asyrylady.
Mádenı ortalyqtyń ashylý rásimine Mádenıet basqarmasynyń basshysy Danııar Álıev, Jazýshylar odaǵynyń tóraǵasy Mereke Qulkenov, AQSh-tyń Almatydaǵy Bas konsýly Mıshel Erkin, AQSh Bas konsýlynyń baspasóz, mádenıet jáne bilim jónindegi keńesshisi Hıra Kaýr Kambodj bastaǵan bilim berý jáne mádenıet uıymdarynyń ókilderi qatysty.
«Jastardyń bilim alyp, shyǵarmashylyq jáne zııatkerlik turǵydan damýyna jol ashatyn osyndaı zamanaýı ortalyq kitaphanada ashylýy mádenıet salasyn damytýdyń mańyzdy baǵyty sanalady. Bul bastama eki el arasyndaǵy mádenı yntymaqtastyqty nyǵaıtyp, ózara túsinistik pen seriktestikti jańa deńgeıge kóteredi dep senemin» deıdi Danııar Álıev.
AQSh-tyń Almatydaǵy Bas konsýly Mıshel Erkin bilim keńistigi turǵyndar suranysyna saı ashylǵanyn, ortalyq ǵylym-bilimge yntaly jastardy únemi qoldaıtynyn jetkizdi.
Ortalyqta 3D-basyp shyǵarý, dızaın, robottehnıka, baǵdarlamalaý, ǵylymı tájirıbeler men qoldanbaly shyǵarmashylyqqa arnalǵan zamanaýı quraldardyń bári qarastyrylǵan. Mundaǵy amerıkalyq ádebıet buryshynan álemge áıgili klassıkterdiń jaýhar shyǵarmalaryn da tabasyz.
Jańa ortalyqtyń ashylýyna kitaphana oqyrmandary, ásirese jastar dán rıza. Bolashaqta AQSh-ta bilim alýdy maqsat etken joǵary synyp oqýshylary óz áserimen bólisti.
«Men úshin bul joba – úlken múmkindik. Munda AQSh ýnıversıtetterine túsýge qajetti aqparat alyp, aǵylshynshamdy jetildirip, ózimdi kásibı ári shyǵarmashylyq turǵydan damytýǵa bolady. Osyndaı keńistiktiń ashylǵany kóptegen stýdenttiń armanyn júzege asyrýǵa jol ashady dep oılaımyn», deıdi Jambyl kitaphanasynyń turaqty oqyrmany Arýjan Mahanbetqalıeva.
ALMATY