«Azamattarǵa arnalǵan úkimet» memlekettik korporasııasynyń Qyzylorda oblystyq fılıaly taratqan bir málimetke janymyz jylydy. О́tken jyldy qorytyndylaǵan fılıal mamandary Jalaǵash aýdanynda birde-bir otbasynyń ajyrasýy tirkelmegenin aıtyp otyr. Olar muny sırek kezdesetin qubylysqa balaıdy.
Jalpy, oblysta ótken jyly 3 792 neke, 338 ajyrasý tirkelgen eken. Jyl ishinde Qyzylorda qalasynda 197 otbasynyń shańyraǵy shaıqalypty. Buzylǵan nekeler sany jóninen ekinshi orynda Baıqońyr qalasy, odan keıin Jańaqorǵan aýdany tur. Mamandar buzylǵan nekelerdiń jalpy sany ótken jylmen salystyrǵanda 14%-ǵa tómendegenin aıtady.
О́ńirdegi ajyrasý deńgeıiniń tómendeýi otbasy ınstıtýtyn nyǵaıtý men otbasylyq qundylyqtarǵa jaýapkershilikpen qaraýdy qalyptastyrý baǵytyndaǵy jumystyń jemisi. Jalaǵashtaǵy jaqsy úrdis basqalarǵa da juǵysty bolǵaı. Shaıqalmasa shańyraq, qandaı baqyt!
QYZYLORDA