Bıyl elimiz Eýrazııalyq ekonomıkalyq odaqqa tóraǵalyq etedi. Máskeýde ótken Eýrazııalyq ekonomıkalyq komıssııa keńesiniń bıylǵy alǵashqy otyrysyn asha otyryp, Serik Jumanǵarın Keńes músheleri men baıqaýshy elderdiń ókilderine arnap sóz sóılep, Qazaqstan tóraǵalyǵynyń negizgi basymdyqtaryn atap ótti.
«Qazaqstan Prezıdenti memleket basshylaryna joldaǵan úndeýinde EAEO aıasyndaǵy ortaq jumysymyzdyń basym baǵyttaryn aıqyndady. 2026 jyly ekonomıkanyń túrli salasynda jasandy ıntellekt quraldaryn engizýge, Odaqtyń logıstıkalyq áleýetin tıimdi paıdalanýǵa, ónerkásip pen agroónerkásip keshenin sıfrlandyrýǵa, ózara saýdadaǵy kedergilerdi joıýǵa, sondaı-aq úshinshi eldermen saýda-ekonomıkalyq yntymaqtastyqty damytýǵa basa nazar aýdarý usynylady», dedi ol.
Sonymen qatar ortaq úderisterdi tolyq kólemde júzege asyrýdyń mańyzdylyǵy atap ótildi. Qazir bekitilgen 77 ortaq úderistiń tek 42-si ǵana naqty júzege asyrylǵan. Ýákiletti organdardyń aqparattyq júıeleri ózara ıntegrasııalanbaı, Odaq ishinde taýarlardyń erkin qozǵalysyn qamtamasyz etý qıyn.
Basym baǵyttardyń biri retinde «kedergisiz» tranzıt aıqyndaldy. Bul navıgasııalyq plombalardy keńinen qoldanýdy, biryńǵaı tranzıttik deklarasııany engizýdi jáne kedendik bajdardy tóleýdi qamtamasyz etýdiń birizdendirilgen tetikterin paıdalanýdy kózdeıdi. Mundaı sharalar tasymal úderisin jedeldetip, onyń qunyn tómendetýge tikeleı yqpal etedi.
Sondaı-aq kooperasııalyq jobalardy damytýǵa aıryqsha kóńil bólinedi. Qazir Qazaqstan, Qyrǵyzstan, Belarýs jáne Reseı kompanııalarynyń qatysýymen bes kooperasııalyq joba maquldanǵan. Negizgi mindet – kooperasııa qorjynyn keńeıtý, birlesken óndiristi ulǵaıtý, jańa jumys oryndaryn ashý jáne lokalızasııalaý deńgeıin arttyrý.
О́tkizý naryqtaryn keńeıtý maqsatynda úshinshi eldermen saýda kelisimderin kezeń-kezeńimen ilgeriletý usynyldy. Bul kelisimder EAEO-ǵa múshe memleketterdiń bıznesi úshin turaqty ósýdiń negizgi kózderiniń biri retinde qarastyrylady.