Aýstralııa ashyq chempıonatynda Qazaqstannyń birinshi raketkasy, álemniń úshinshi raketkasy atanǵan Elena Rybakına Belarýs ókili Arına Sobolenkony 6:4, 4:6, 6:4 esebimen jeńdi, dep habarlaıdy Egemen.kz
Áıelder arasyndaǵy jekeleı synda ótken sheshýshi matchta Elena Rybakına belarýstik úzdik tennısshisi Arına Sobolenkomen kezdesti.
Alǵashqy set Rybakınanyń paıdasyna sheshildi. Ol 37-mınýtta 6:4 esebimen jeńiske jetti. Bul partııa Sobolenko úshin qazirgi Australian Open týrnırinde jáne jalpy maýsymdaǵy alǵashqy jeńilis boldy.
Ekinshi sette Sobolenko dál osyndaı eseppen (6:4) basym túsip, qarymta qaıtardy. Bul partııa 50 mınýtqa sozylyp, Australian Open-2026 týrnırinde Rybakına úshin alǵashqy utylǵan set retinde tirkeldi.
Elimizdiń úzdik tennısshisi Australian Open týrnırinde qansha tabys tapty?
Úshinshi set asa tartysty ótti. Sobolenko 3:0 esebimen alǵa shyqqanymen, Rybakına qatarynan bes oıyn utyp, esepti 5:3-ke jetkizdi. Degenmen, belarýstik tennısshi esepti 4:5-ke deıin qysqartty.
Sońǵy set Rybakınanyń enshisinde qaldy. Esep 6:4. Qorytyndy set 51 mınýtqa, al búkil match 2 saǵat 19 mınýtqa sozyldy.
Osylaısha, Elena Rybakına Australian Open týrnıriniń chempıony atanǵan Qazaqstan tarıhyndaǵy alǵashqy tennısshi boldy.
Eske sala keteıik, buǵan deıin Rybakına «Úlken dýlyǵa» týrnırinde tek bir ret jeńiske jetken – 2022 jyly Ýımbldonda. Al Aýstralııanyń ashyq chempıonatynda 2023 jyly fınalda oınap, dál osy Sobolenkodan jeńilgen edi.
Bıylǵy Australian Open týrnıriniń jalpy júlde qory 74,9 mıllıon dollardy quraıdy, bul ony álemdik kúntizbedegi eń tabysty týrnırlerdiń birine aınaldyrady.
Áıelder arasyndaǵy jekeleı synda jeńiske jetken sportshy 2 793 365 dollar kóleminde júlde qarjysyn jáne WTA reıtınginde 2000 upaı alady.