Semeıdegi M.Áýezov atyndaǵy pedagogıkalyq kolledjdiń «Es-Aımaq» rýhanı ortalyǵynda «Zań men tártip jolyndaǵy 5 jyl» atty óńirlik forým ótti, dep habarlaıdy Egemen.kz.
Atalǵan is-sharaǵa oblys ákimi Berik Ýálı jáne quqyq qorǵaý organdarynyń jetekshileri men sala ardagerleri qatysty.
Abaı oblysy boıynsha ekonomıkalyq tergep-tekserý departamentiniń uıymdastyrýymen ótken saltanatty jıynda quttyqtaý sóz sóılegen aımaq basshysy sala mamandarynyń atqarǵan eńbegine joǵary baǵa berip, quqyqtyq tártip pen ekonomıkalyq qaýipsizdikti qamtamasyz etý jolyndaǵy tabysty jumystary úshin alǵys bildirdi.
«Memleket basshysy Qasym-Jomart Toqaev «Jasandy ıntellekt dáýirindegi Qazaqstan: ózekti máseleler jáne ony túbegeıli sıfrlyq ózgerister arqyly sheshý» atty Qazaqstan halqyna Joldaýynda «Elimizdiń saıası júıesi anaǵurlym ozyq ári ashyq bola tústi. Azamattarymyzdyń sana-sezimi, bolmysy ózgerip jatyr. Sonyń arqasynda halqymyzdyń memlekettik ınstıtýttarǵa, zańǵa jáne ádildik pen tártipke degen senimi nyǵaıýda» degen bolatyn. Sondyqtan Abaı oblysy boıynsha ekonomıkalyq tergep-tekserý departamenttiń qurylýy jaı ǵana ákimshilik sheshim emes, jańa óńirde ornyqty ekonomıkalyq qaýipsizdik júıesin qalyptastyrý jolyndaǵy mańyzdy qadam bolǵany sózsiz. Qoǵamnyń quqyq qorǵaý organdaryna qoıatyn talaby kúnnen-kúnge artyp keledi. Sizder jergilikti atqarýshy organdarmen birlese otyryp, qylmystyń aldyn alý, qoǵamdyq tártipti saqtaý, azamattardyń quqyqtary men qaýipsizdigin qorǵaý baǵytynda naqty nátıjelerge qol jetkizesizder dep úmittenemin. Basty maqsatymyz – turǵyndarymyzdyń tynyshtyǵy men ómir sapasyn qamtamasyz etý. Osy salada jumys istep jatqan barsha azamattardy bes jyldyq belespen shyn júrekten qutyqtaımyn», dedi oblys ákimi.
2022 jyly Abaı oblysynyń qurylýyna baılanysty Qazaqstan Respýblıkasynyń Qarjylyq monıtorıng agenttiginiń aýmaqtyq bólimshesi retinde Abaı oblysy boıynsha ekonomıkalyq tergep -tekserý departamenti quryldy. Departament óńirde zań buzýshylyqtardyń aldyn alý, azamattardyń quqyǵyn qorǵaý baǵytynda júıeli jumys júrgizip keledi.
Oblystaǵy ózekti máselelerdiń biri – zań buzýshylyqpen bastalǵan kommersııalyq turǵyn úılerdegi úleskerlerdiń máselesi. 2022-2024 jyldar aralyǵynda júrgizilgen taldaý nátıjesinde Semeıde jalpy 547 úleskeri bar 17 kópqabatty kommersııalyq turǵyn úı anyqtaldy. Atalǵan nysandardyń 9-y boıynsha sottyń májbúrlep buzý týraly sheshimi shyqqan. Máseleni sheshý maqsatynda Abaı oblystyq prokýratýrasy, Ekonomıkalyq tergep-tekserý, Ádilet jáne Polısııa departamentteri ókilderiniń qatysýymen birlesken otyrystar ótkizildi. Nátıjesinde 282 úleskerdiń máselesi oń sheshimin tapty.
Shara barysynda Abaı oblysy boıynsha ekonomıkalyq tergep-tekserý departamentiniń basshysy Erjan Bólegenov birqatar qyzmetkerlerge «Qarjylyq monıtorıng agenttigine 5 jyl» estelik tósbelgisi men Alǵys hatttardy tapsyrdy.