Olımpııa oıyndaryna qatysatyn elimizdiń sportshylary qatarynda daryndy jastar az emes. Solardyń arasynda Anastasııa Gorodkonyń shoqtyǵy bıik. Frıstaıldy serik etken 20 jastaǵy burymdy osyǵan deıin de bıik belesterdi baǵyndyryp, óziniń shynaıy áleýetin baıqatqan edi.
Anastasııa 2005 jyly О́skemende dúnıege keldi. Bes jasynan frıstaıl-mogýlǵa qyzyǵyp, jergilikti jattyqtyrýshy Vıktor Reıherdtiń qol astynda jattyqty. Balaýsa shaǵynan dara talantymen oqshaýlanyp, óz qatarynyń aldy boldy. Elishilik jarystarda jeńis tuǵyryna kóterilgennen keıin halyqaralyq dodalarǵa qatysty. Bul rette de ózin jaqsy qyrynan kórsetti. 2021 jyly Almatyda ótken álem chempıonatynda 16 jasqa da tolmaǵan órimdeı qyz ózinen áldeqaıda tájirıbeli qarsylastaryn qapy qaldyryp, qola medaldy moınynda jarqyratty. Kelesi jyly Beıjiń Olımpıadasynda baq synady. Sol maýsymda jerlesimiz Italııadaǵy jastar arasynda ótken álem birinshiliginde mogýl men parallel mogýldy qosa alǵanda 1 altyn, 2 kúmisti qorjynǵa saldy.
Apennın túbeginen oralǵannan keıin Anastasııa óziniń týǵan ólkesi – Shyǵys Qazaqstan oblysy aýmaǵynda jol apatyna tústi. Motosıkl tizgindegen jas qara joldyń boıynda jeńil kólikpen soqtyǵysyp, aýyr jaraqat aldy. Oǵan eki operasııa jasaldy. Biri – elimizde, ekinshisi – Germanııada. Jaǵdaıy ońalǵannan keıin Gorodko súıikti isimen qaıta aınalysyp, túrli jarysta boı kórsetti. Kendi Altaıdyń arýy jastardyń dúnıejúzilik dodasynda bir emes, birneshe márte top jardy. Odan bólek, kúmis medaldy da ıelendi.
О́tken jyl Anastasııaǵa asa tabysty boldy. Áýeli ol Shveısarııanyń Engadıninde shymyldyǵy túrilgen áıelderdiń álem chempıonatynda qolaǵa qol sozsa, Italııanyń Týrıninde alaý tutanǵan Dúnıejúzilik ýnıversıadada eki márte altyn tuǵyrdan qol bulǵady. Sondaı-aq otandasymyz Álem kýboginiń eki kezeńinde qarsylas shydatpaı, bas júldeni oljalady. Endi biz ýaqyt ozǵan saıyn sheberlik deńgeıi ósip kele jatqan Anastasııadan Olımpıadada da júlde kútemiz.