QOSTANAI.13 tamyz. Qostanaı oblysynda aýyl sharýashylyǵy salasy qyzmetkerleriniń kúzgi jıyn-terin aldyndaǵy keńesi ótti. Bul týraly egemen.kz tilshisi habarlady.
Qostanaı óńirinde astyq jınaý naýqany bastaldy. Qazir suly men arpaǵa oraq tústi. Tamyz aıynyń 20-na qaraı oblys óńirinde astyq jınaýǵa jappaı attanys bastalady. Aýyl sharýashylyǵy qyzmetkerleriniń keńesinde aıtylǵandaı, bul ýaqytta barlyq astyqtyń 6 paıyzy qambaǵa túsýge tıis. Al tamyzdyń 25-ne qaraı 37 paıyzy jınalsa, 1 qyrkúıekte bıdaıdyń 90 paıyzy jınalyp, sol aıdyń ortasyna qaraı naýqan aıaqtalýy kerek.
Kóktemde tópep jaýǵan jaýynǵa baılanysty dán dál ýaqytynda sebilgen joq. Jańbyr kóp jaýǵan oblystyń soltústik aýdandarynda kóktemgi dala jumystary maýsymnyń 10-nan keıin aıaqtalǵan bolatyn. Sondyqtan eginniń ala pisetini dıqandarǵa belgili bolyp otyr. Bıylǵy astyqtyń jınalýy da tehnıkanyń kúshi men kúzgi aýa raıynyń qalaı qubylýyna baılanysty bolady.
Oblys ákiminiń orynbasary Bazyl Jaqypov: «Bıyl ortasha gektar túsimi 10-11 sentnerden aınalady dep otyrmyz. Jalpy ónim 4.5 mıllıon tonna bolyp qalady. Biraq aýa raıynyń oraqqa qanshalyqty qolaıly bolaryn dál kesip aıtý da qıyn. Aýdandyq aýyl sharýashylyǵy bólimderi mamandarynyń aıtýynsha, 225 myń gektardaı bıdaı alqaby endi bas alyp keledi, 2 mıllıon gektardaı alqap gúldeý satysynda tur. Munyń barlyǵy da kóktemde dánniń kesh sińirilýinen bolǵany belgili. Onyń tolyq pisýine 30-35 kún kerek», – dedi.
Aýyl sharýashylyǵy qyzmetkerleriniń astyq jınaý naýqany adyndaǵy keńesinde tehnıkanyń daıyndyǵyna jáne naýqan kezindegi jumystardyń bilikti uıymdastyrylýyna barynsha kóńil bólindi.
Názıra Járimbetova.
Derek, sýret: egemen.kz.