Qysqy Olımpııa oıyndarynda taǵy birneshe sport túrlerinen básekeler ótip, medaldar jıyntyǵy sarapqa salyndy.
Seısenbide elimizdiń bir top sportshysy jarys jolyna shyqty. Shańǵyshylar sprıntinde qyzdarymyz: Darıa Rıajko – 55, Anna Melnık – 58, Nadejda Stepashkına – 63, Ksenııa Shalygına 72-orynda qalyp qoıdy. Erler de óz jankúıerlerin qýanta almady. Vıtalıı Pýhkalo – 75, Ámirǵalı Muratbekov – 76, Naıl Bashmakov 85-satyǵa taban tiredi.
Short-trekshilerdiń 500 metrlik saıysynda Iаna Han men Olga Tıhonova baq synady. Olga birinshi irikteý synynda tórtinshi oryn alyp, shırek fınaldan tys qaldy. Báseke barysynda bir qulap turǵan Iаna da júldeli orynǵa talasý múmkindiginen aıyryldy. Erlerdiń 1 000 metrlik qashyqtyǵynda Denıs Nıkısha úmitti aqtamady. Aralas estafetada Abzal Ájǵalıev, Denıs Nıkısha, Olga Tıhonova, Iаna Han da kózdegen maqsattaryna qol jetkize alǵan joq.
Frıstaıl-mogýlshylardyń saıysynda fınalǵa shyǵý úshin TOP-10-dyqtyń qatarynan kóriný kerek edi. 9-oryn ıelengen Pavel Kolmakovty endi negizgi jarysta baq synaıdy. Áıelderdiń nátıjeleri mynadaı: Anastasııa Gorodko – 12, Iýlııa Galysheva – 14, Aıaýlym Ámirenova – 20-oryn. Olar endi ekinshi irikteýge qatysady. Bıatlonshylardyń 10 shaqyrymdyq básekesinde Vladıslav Kıreev 53, Áset Dúısenov 74-satyǵa jaıǵasty.
Mánerlep syrǵanaýdyń qysqa baǵdarlamasyn Mıhaıl Shaıdorov 92,94 upaı jınap, besinshi orynmen qorytyndylady. Alǵashqy úsh oryndy amerıkalyq Ilıa Malının (108,16 upaı), japonııalyq Iýma Kagaıama (103.07), fransııalyq Adam Sıao Hım Fa (102.55) oljalady. Jeńis tuǵyryna kóterilýge Mıhaıldyń áli de múmkindigi bar. Ol úshin sportshymyz 13 aqpanda ótetin erkin baǵdarlamada barynsha jaqsy nátıje kórsetýge tıis. Eń bastysy, jerlesimiz ózine senimdi. BAQ ókilderine bergen suhbatynda Shaıdorov: «Bul jarystyń júıkege biraz salmaq túsirgeni ras. Árıne, ózgeshe bolý múmkin emes edi. О́ıtkeni bul álem chempıonaty emes, tórt jylda bir ótetin Olımpııa oıyndary. Alǵashynda qobaljyǵanymmen, der kezinde óz-ózime kele aldym. Besinshi oryn da jaman nátıje emes. Endi sál tynyǵyp alamyn da, negizgi jarysta jankúıerlerdi qýantýǵa tyrysamyn», dep aqtaryla sóıledi.
Jalpy komandalyq esepte Norvegııa jeke-dara kósh bastap tur. Skandınavııalyqtardyń qorjynynda 12 (6 altyn+2 kúmis+4 qola) júlde bar. Olardy Germanııa (3+2+1), Shvesııa (3+2+1), Shveısarııa (3+1+2) ókshelep keledi. Úzdik bestikti AQSh (2+3+2) túıindep tur. Sondaı-aq Aýstrııa (2+3+0), Italııa (2+2+7), Japonııa (2+2+4), Fransııa (1+2+0), Nıderland (1+1+0), Slovenııa (1+1+0), Chehııa (1+1+0) quramalarynyń da jaǵdaıy jaman emes.