Energetık, memleket qaıratkeri, HH ǵasyrdyń kórnekti ınjeneri jáne Dinmuhamed Qonaevtyń týysy Altaı Qadyrjanov 84 jasyna qaraǵan shaǵynda ómirden ótti, dep habarlaıdy Egemen.kz.
Qaraly habardy Dinmuhamed Qonaev atyndaǵy Halyqaralyq qordyń baspasóz qyzmeti habarlady.
«Altaı Qadyrjanov – kórnekti energetık, memleket qaıratkeri, HH ǵasyrdyń ınjeneri, joǵary mádenıetti jáne adaldyq qasıetine ıe tulǵa. Ol Qazaqstannyń energetıkalyq júıesin quryp, nyǵaıýyna zor úles qosqan adam. Onyń kásibı joly – elge qyzmet etýden turady. Dinmuhamed Qonaevtyń týysqany bolǵandyqtan, ol kez kelgen artyqshylyqtan sanaly túrde bas tartqan, jáne bedelin tek eńbegimen, bilimimen jáne isimen dáleldedi», delingen habarlamada.
Qordyń málimetinshe, onyń basshylyǵymen negizgi energetıkalyq nysandar damyp, jylý jáne elektrmen jabdyqtaý salasynda júıeli sheshimder jasalyp, eldiń bolashaǵyna berik negiz qalanǵan.
«Altaı Qamaluly tek ınjener nemese jetekshi maman ǵana emes, sonymen qatar keń kóregendiligi bar adam, mádenıet, ǵylym jáne ulttyq bastamalardy eń qıyn jyldary qoldaǵan mesenat boldy», delingen habarlamada.
Ol KSRO-nyń qurmetti energetıgi ataǵyna ıe, sonymen qatar «Qurmet» ordenimen marapattalǵan. HH ǵasyrdyń kórnekti ınjenerleriniń biri retinde tanymal.
Dinmuhamed Qonaevtyń qaryndasy Raýza Qonaeva dúnıeden ozdy