ASTANA. 26 naýryz. Búgin prezıdenttikke úmitkerlerdiń úgit-nasıhat júrgizý naýqany bastaldy. Bul týraly Ortalyq saılaý komıssııasynyń baspasóz qyzmetiniń deregine súıengen egemen.kz habarlady.
Ortalyq saılaý komıssııasynyń málimeti boıynsha, aldaǵy 30 kúnniń aralyǵynda kandıdattardyń saılaýaldy baǵdarlamasy teledıdar men radıoda jáne baspasóz betterinde jarııalanatyn bolady. Sonymen qatar, úmitkerler saılaýshylarmen kezdesip, sporttyq sharalardy uıymdastyrýǵa quqyly. Alaıda, osy aralyqta kandıdattarǵa ártúrli qaıyrymdylyq sharalaryn ótkizýge, azamattarǵa syıaqy berýge tyıym salynady. Úgit jumystaryna áskerıler, sot nemese quqyq qorǵaý organdar men memlekettik qyzmetshiler, BAQ ókilderi qatysa almaıdy. Nasıhat jumystary 24 sáýirde toqtatylady. Konstıtýsııa talaptaryn oryndamaǵandar zań aldynda jaýap beredi.
Aıta ketetin jaıt, úgit jumystaryn júrgizý úshin kandıdattarǵa respýblıkalyq bıýdjetten teńdeı qarajat bólindi. Shyǵystardyń jalpy kólemi 7 mıllıon 10 myń teńgeni quraıdy. Sheteldik memleketterden 133 halyqaralyq uıym, BAQ ókilderi saılaýǵa baıqaýshy retinde qatysýǵa quqyly.
«Baǵdarlamany teledıdar arqyly baıandaý 5 mıllıon 250 myń teńge somasynda, ekinshi baǵdarlamany radıo arqyly baıandaý 200 myń teńge somasynda, úshinshi baspa basylymdaryna 2 maqala jarııalaý 810 myń teńge, saılaýshylarmen kezdesý úshin úı-jaı jaldaý 200 myń teńge somasynda. Úgittik baspa materıaldaryn basyp shyǵarý 250 myń. Kólik shyǵyndary 300 myń teńge», - dep atap kórsetti Ortalyq saılaý komıssııasynyń hatshysy Baqyt Meldeshov.
Sáken Maılybaı.