Italııada ótip jatqan qysqy Olımpııa oıyndarynda elimizdiń ánurany shyrqalyp, kók týymyz jelbiredi. Mıhaıl Shaıdorov – mánerlep syrǵanaýdan Olımpıada chempıony! Biz bul tarıhı sátti tabany kúrekteı 32 jyl kúttik.
Jeti birdeı qysqy Olımpıada dodasynda buıyrmaı kelgen altyn medal enshimizge jazyldy. Jahannyń jampozdary kóksúńgi muzdyń ústinde qazaq sportshysymen shendese almaı, talantyna tánti boldy. XXV qysqy Olımpııa oıyndarynda mánerlep syrǵanaýdan erler arasyndaǵy saıys asa tartysty ótti.
Aldymen qysqa baǵdarlamada álemniń tańdaýly maıtalman mánerlep syrǵanaýshylary aıdynǵa shyqty. Jerlesimiz Mıhaıl Shaıdorovtyń ónerin qazylar alqasy 5-orynǵa laıyq dep sanady. Qysqa baǵdarlamada amerıkalyq Ilıa Malının 108,16 upaıdy qanjyǵasyna bókterip, talassyz kóshbasshy ekenin ańǵartty. Ári ol 1976 jyldan 2024 jylǵa deıin tyıym salynǵan artqa salto jasaıtyn asa qaterli elementti múltiksiz oryndady. Qysqa baǵdarlamada 2-orynǵa japon úmiti Iýma Kagııama (103,07 upaı) jaıǵassa, fransııalyq Adam Sıao Hım Fa 102,55 upaı oljalap, úzdik úshtikti túıindedi. Italııa eli úmit artqan Danıel Grassl 93,46 upaımen 4-satyǵa jaıǵasty.
Sarapshylar eki dúrkin álem chempıony, tórt qurlyq dodasy, gran-prı kezeńderinde aldyna qara salmaı top jaryp júrgen Malınınniń mereıi ústem túsedi dep ton pishti. О́ıtkeni erkin baǵdarlama saıysy bastalmas buryn Ilıa Malının tórt aınalym elementin bir emes jeti márte júzege asyrady degen boljam aıtyldy. Iýma Kagııama men Adam Sııa Hım Fa tórt ret tórt aınalym elementin oryndaımyn dep jospar túzdi. M.Shaıdorov ta erkin baǵdarlamada osy elementti oryndaýdy josparlady. Ol birinshi elementin óte múltiksiz oryndady. Iаǵnı úsh aınalym aksel oryndaǵan soń birden úzilissiz tórt aınalym salhov elementin jalǵap sekirý ádisin tek Shaıdorov qana júzege asyra aldy. Sóıtip, negizgi baǵdarlamasyn óte sátti aıaqtap, 198,64 upaıdy enshisine jazdy. Áýel basta tórt aınalym elementin tórt márte jasaımyn degen jerlesimiz aıdynǵa aıbyndanyp shyǵyp, bes ret tórt aınalym elementin, odan keıin úsh aınalym akselge tórt aınalym salhov elementin qosa sátti oryndady. Olımpıada alamanyna qatysqan mánerlep syrǵanaýshylardyń eshbiri bul elementti qaıtalaı alǵan joq. Qos baǵdarlamada 291,58 upaı oljalaǵan otandasymyz talassyz medal alatyndar sanatyna qosyldy. Shaıdorov erkin baǵdarlamada Qazaqstannyń halyq ártisi Dımash Qudaıbergenniń oryndaýyndaǵy týyndynyń áýenimen óner kórsetti.
Negizgi baǵdarlamasyn oryndaý kezinde súringen Adam Sııa Hım Fa men Iýma Kagııama altyn júldeden qaǵyldy. Basty básekelesi Ilıa Malının de erkin baǵdarlama barysynda eki ret qulap, basqa elementterdi de oıdaǵydaı oryndaı almady. Nátıjesinde, qos saıystyń qorytyndysynda 8-orynǵa bir-aq syrǵydy. Ekinshi, úshinshi oryndarǵa Iýma Kagııama men taǵy bir japondyq sportshy Shýn Sato ıe boldy.
Byltyr 20 jasynda álem chempıonatynan kúmis, Tórt qurlyq alamanynan altyn medal oljalaǵan Mıhaıldyń jarqyn jeńisi kezdeısoq tabys emes, bul – alty jasynda ákesi Stanıslav Shaıdorovtyń baǵyttaýymen muz saraıyna kelgen balanyń tabandy eńbegi men tókken teriniń óteýi. Elimizde mánerlep syrǵanaý mektebiniń irgesi myǵym ekenin 2014 jyly Sochı Olımpıadasynda Denıs Ten áıgilep, qola medal enshilegen-di. Jahandyq dodalardan da alǵan júldemiz az emes.
1994 jyly Lıllehammer (Norvegııa) Olımpıadasynda shańǵy sportynan Vladımır Smırnov altyn medal ıelenip, Ánuranymyzdy shyrqatqan edi. Arada 32 jyl ótkende aq alamannyń tórinde mereıimizdi tasytqan Mıhaıl Shaıdorov qandaı syı-qurmetke de laıyq.
Týrızm jáne sport mınıstri Erbol Myrzabosynov talantty sportshyny tarıhı jetistigimen quttyqtap, zor tabys tiledi.
Búginde sheteldik aqparat quraldarynyń nazarynda da – Shaıdorov esimi. Mıhaıldiń jeńisin Olımpıadanyń sensasııasy dep baǵalap, qazaq sportshysynyń fenomenine tańdaı qaǵyp jatyr barsha álem halqy.
Mánerlep syrǵanaýdan Lıllehammer qysqy Olımpıadasynyń chempıony Alekseı Ýrmanovtan tálim alatyn Mıhaıl tolaıym tabysyna alǵashynda sene almaǵanyn da jasyrmady. «Shynymdy aıtsam, buǵan sene almadym. О́ıtkeni búkil maýsym boıy óz-ózimmen kúrestim, kem-ketikti bútindeýge umtyldym. Burnaǵy jarystarda bes ret tórttik sekirýdi oryndaýǵa tyrysqanymmen júzege asyra almaı kelgen edim. Olımpıada aıdynynda bári sátimen iske asty. Barsha jankúıerge alǵysym sheksiz, bul bizdiń ortaq jetistigimiz», dedi altyn azamat.