ASTANA. 26 naýryz. Afrıkada shańǵy kýrorty bar degenge sener me edińiz? Ras, sený qıyn. Degenmen, qara qurlyqta da qar jaýady. Marokkonyń Ifran atty qalasy bar. Atlas taýynan oryn tepken qala teńiz deńgeıinen 1665 metr bıiktikte tur. Mine, dál osy jerde Alpidegi shańǵy kýrorttarynan kem túspeıtin keshen bar. Bul týraly egemen.kz habarlady.
Ifrannyń aýa raıy Eýropaǵa óte uqsas. Qańtar-naýryz aılarynda qar jaýyp, kádimgi ózimiz biletin qys bolady. Qalanyń ózi de eýropalyq stılde salynǵan. Sol sebepti de bul jerdi «Marokkonyń Shveısarııasy» dep ataıdy.
Qysta aýa temperatýrasy Selsıı kórsetkishi boıynsha 0 gradýstyń mańaıynda bolady. О́ńirdegi eń tómengi temperatýra -24 gradýs bolǵany tarıhta jazýly tur. Al jazda ortasha aýa temperatýrasy +28 gradýs.
Qalanyń irgetasyn 1930 jyldary Fransııadan kelgen jumysshylar qalaǵan. Ol kezde Marokko atalǵan eldiń bodany bolǵany belgili. 1956 jyly azattyq alǵan kezde eldegi barlyq fransýz Eýropaǵa oralyp, qala tolyǵymen jergilikti halyqtyń ıgiliginde qaldy. Sodan beri marokkolyqtar Ifrannyń aýmaǵyn keńeıtip, jańa nysandar salǵanymen, qalanyń negizin sol kúıinde qaldyrdy.
Endeshe Afrıkadaǵy shańǵy kýrorty bolǵany úshin ǵana eldiń nazaryn aýdarǵan qalaǵa birge saıahat jasaıyq.
Elaman Qońyr.
Derek: egemen.kz.
Sýret: facebook.com.