Taldyqorǵan qalasyndaǵy «Atameken» kásipkerler palatasy alańynda «Ádiletti jáne Progressıvti Qazaqstannyń Halyqtyq Konstıtýsııasy úshin» jalpyulttyq koalısııasynyń jumysy sheńberinde Jetisý oblysy aktıvimen kezdesý ótti. Is-shara jańa Konstıtýsııa jobasy men alda bolatyn respýblıkalyq referendým boıynsha túsindirý jumysynyń bóligi retinde uıymdastyryldy, dep habarlaıdy Egemen.kz.
Premer-mınıstrdiń orynbasary – Mádenıet jáne aqparat mınıstri, Koalısııa tóraǵasynyń orynbasary Aıda Balaeva óz sózinde reformanyń saıası-áleýmettik mánine keńinen toqtala kele, Memleket basshysynyń uıytqy bolýymen qolǵa alynǵan ózgerister memlekettik basqarýdyń ádil, ornyqty ári tıimdi modelin qalyptastyrýǵa baǵyttalǵanyn atap ótti. Keń kólemdi reformalar paketiniń basty erejeleriniń biri retinde bir palataly Parlamenttiń qurylýyn tilge tıek etip, bul óz kezeginde ınstıtýttardyń jaýapkershiligin kúsheıtip, zańnamalyq úderisti jedeldete túsetinin aıtty.
«Memleket basshysynyń referendým ótkizý týraly sheshimi azamattardyń tikeleı tańdaýy arqyly taǵdyrsheshti ózgeristerdi bekitýge baǵyttalǵan mańyzdy demokratııalyq qadam dep esepteımin. Referendým – jaı ǵana formaldy prosedýra emes, ol – strategııalyq mańyzy zor sheshimderdi qabyldaýǵa halyqtyń tikeleı qalysýynyń tıimdi tetigi», dep atap ótti Aıda Balaeva.
Májilis depýtaty Bolat Kerimbek jańa jobanyń áleýmettik jáne qundylyq turǵysyndaǵy mańyzyna toqtaldy. Onyń aıtýynsha, adamdar Konstıtýsııany qaýipsizdik pen ádildiktiń is júzindegi kepildigi retinde sezinýge tıis.
«Referendýmda tańdaý jasaý – óz taǵdyryń úshin ári memlekettiń bolashaǵy úshin jaýapkershilik. О́ıtkeni Konstıtýsııa – memlekettiń ǵana emes, árbir otbasynyń da qorǵany», dep atap ótip, qoǵamdyq kelisim men ulttyq qundylyqtardy nyǵaıtýdyń mańyzyn eske saldy.
Jańa jobany talqylaý jıynyna Májilis depýtaty Nıkıta Shatalov, Abaı atyndaǵy QazUPÝ basqarma tóraǵasy – rektory Bolat Tilep, «Qazaqstan halqyna» QQ basqarma tóraǵasy Lázzat Shyńǵysbaeva, «Qazaqstandyq qoǵamdyq damý ınstıtýty» KeAQ basqarma tóraǵasy Juldyzaı Ysqaqova, Jetisý oblystyq máslıhatynyń tóraǵasy Gúlnar Toılybaeva, Jetisý oblysy Ardagerler keńesiniń tóraǵasy Ermek Kelemseıit qatysty.
Qazaq ulttyq pedagogıkalyq ýnıversıtetiniń basqarma tóraǵasy – rektory Bolat Tilep jańa Konstıtýsııanyń mańyzy men mazmuny týraly oıymen bólisti.
«Jańa Ata zańnyń mazmunynda «Ádiletti Qazaqstan» ıdeıasynyń arman-muraty, múmkindikteri men jaýapkershiligi, saýaldary men jaýaptary kórinis tapqan. Usynylyp otyrǵan ózgeristerdiń tereń maǵynasy men tarıhı mańyzyn men osydan kóremin», dep atap ótti ol.
«Qazaqstandyq qoǵamdyq damý ınstıtýty» KeAQ basqarma tóraǵasy Juldyzaı Ysqaqova neke ınstıtýtyn konstıtýsııalyq turǵyda nyǵaıtý máselesin kóterip, memlekettiń quqyqtyq jáne qoǵamdyq negizderin nyǵaıtýdaǵy atalǵan normalardyń mańyzyn tilge tıek etti.
«Nekeni er men áıeldiń erkin ári teń quqyly odaǵy retinde konstıtýsııalyq turǵyda bekitý qoǵam tarapynan qoldaý taýyp otyrǵan neke modelin joǵary zańdyq kúshi bar norma retinde bekitýge, memlekettik organdardyń quqyq qoldaný jáne profılaktıkalyq qyzmeti úshin biryńǵaı baǵdar qalyptastyrýǵa, nekege májbúrleýdiń kez kelgen formasyna qatysty nóldik tózimdilikti qamtamasyz etýge, otbasy ınstıtýtyn uzaq merzimdi ornyqty qazaqstandyq qoǵamnyń negizi retinde nyǵaıtýǵa múmkindik beredi», dep túsindirdi J.Ysqaqova.
Jetisý oblysy Ardagerler keńesiniń tóraǵasy Ermek Kelemseıit Parlament ataýynyń Quryltaı bolyp ózgerýi jaıyndaǵy bastamanyń mańyzy týraly aıta kele, onyń tarıhı ári rýhanı tereń mánine nazar aýdardy.
«Biz de Parlamenttiń Quryltaı dep atalýy týraly bastamany jaı ǵana atyn aýystyrý emes, tarıhı tamyrymyzǵa qaıtý ári ulttyq biregeılikti bekitý retinde qaraımyz. Bul – bizdiń memlekettilik dástúrlerimizdiń jańǵyrýy men damýy», dedi ol.
Jetisý oblystyq máslıhatynyń tóraǵasy Gúlnar Toılybaeva jańarǵan Ata zańnyń basty erejelerine qatysty oıyn bildirip, memlekettiń qundylyqtyq baǵdarlaryn nyǵaıtý máselesine den qoıdy.
«Ádildik, Zań men Tártip, tabıǵatqa uqypty qaraý Konstıtýsııa deńgeıinde tuńǵysh ret bekitilip otyr. Memlekettik bıliktiń qaınar kózi Qazaqstan halqy ekeni aıqyn jazyldy. Basty ıdeıa – bilimniń, ǵylymnyń, mádenıet pen ınnovasııanyń, sondaı-aq adamı kapıtaldyń damýyna basymdyqtyń berilýi», dep atap ótti ol.
Kezdesý sońynda aımaqtyq aktıv tarapynan qatysýshylar suraqtaryn qoıyp, túsindirý jumysy boıynsha usynystaryn aıtty. Sondaı-aq, azamattardyń referendýmǵa qatysýynyń mańyzyn atap ótti.