Endi az kúnde jazǵy demalystyń qyzyǵyna toımaǵan balalar sómkelerin asynyp alyp mektepke qaraı tompańdap ketip bara jatady. Ata-analar balalaryn mektepke daıyndap, kerek-jaraǵyn alyp, oqý quraldaryn túgendeýde. Jańa oqý jylyna bilim mekemeleri de jan-jaqty ázirlenýde. Al aımaqtardaǵy bilim basqarmalary jyl saıynǵy «Mektepke jol» aksııasyn pysyqtap jatyr.
Burnaǵy kúni oblystyq bilim basqarmasynyń basshysy Baqytjan Saılybaev BAQ ókilderine arnap brıfıng ótkizdi. Onda «Balalarǵa birge kómek bereıik!» uranymen ótetin «Mektepke jol» jalpy respýblıkalyq qaıyrymdylyq aksııasynyń bastalǵanyn jáne osy baǵytta atqarylatyn jumystar jaıyn áńgimeledi.
Qaıyrymdylyq aksııasynyń maqsaty belgili. Az qamtylǵan jáne kópbalaly otbasylar, jetim balalar men ata-ananyń qamqorlyǵynsyz qalǵan oqýshylardy jańa oqý jylyna daıyndap, olardyń túrli sebepterdiń saldarynan mektepke bara almaı qalýynyń aldyn alý. Onsyz da jastaıynan taǵdyrdyń teperishin az kórmegen bala qatarlastary bar keregin saılap, mektepke ketip bara jatqanda ol joqshylyqtyń kesirinen bilim ala almaı jatsa, ádiletti me?! Sondyqtan bul aksııanyń óte úlken saýapty is ekenine shúbá keltirmeımiz.
– Oblysta dástúrli túrde 1 tamyz ben 30 qyrkúıek aralyǵynda ótetin «Mektepke jol» respýblıkalyq aksııasy bastaldy. Eń aldymen, balalardyń tizimi ázirlenedi. Reıd jumystary uıymdastyrylady. Sonymen qatar, balalarǵa kómek kórsetý boıynsha aýdandarda da «Balaǵa meıirim syıla», «Aýyl balalaryna – mektepke syılyqtar», «Balalardy mektepke daıyndaımyz» atty qaıyrymdylyq aksııalar belsendi túrde ótetin bolady. Al shalǵaı eldi mekenderde mektep formasy men qural-jabdyqtarynyń jyljymaly jármeńkeleri uıymdastyrylyp, senim telefondary men jedel baılanys jelileri úzdiksiz jumys jasaıdy. Máselen, ótken jyly oblys boıynsha 24 myń kóp balaly jáne az qamtylǵan otbasylarynan shyqqan balalarǵa qoldaý kórsetilip, qajetti oqý jabdyqtarymen qamtamasyz etilgen bolatyn. Qaıyrymdylyq aksııasy barysynda atqarylǵan jumystar saralanyp, nátıjesin anyqtaý negizinde áleýmettik zertteýler men saýaldamalar júrgiziledi, – deıdi Baqytjan Saılybaev.
Máseleniń mánisin jan-jaqty tarqatýǵa kelgen qalalyq ishki ister basqarmasy ıývenaldy bóliminiń kapıtany, polısııa maıory Gúlnár Dúısenova bylaı deıdi:
– Az qamtylǵan otbasy balalaryn anyqtap, áleýmettik kómek kórsetemiz. Bizde 14 ákimshilik ýchaskelik pýnkt bar. Olar ózderine bekitilgen aýmaqty qatań baqylaıdy. Sondyqtan árbir otbasynyń jaıy belgili. Máselen, ákesi isti bolǵan, al jary 7 balasyn jalǵyz ózi jetildirip otyrǵan otbasy bar. Onyń tórteýi mektepke barady. Osy otbasynyń balalaryna mektepke qajetti oqý quraldarymen qamtamasyz etip otyrmyz. Mine, osyndaı otbasylarmen jumys jasaımyz.
Jáne de shara barysynda basqarma basshysy bıylǵy oqý jylynda 14 bilim berý oshaǵy jańa nysanǵa kóshiriletinin, al oqýlyq jaıy tolyq sheshilgendigin jetkizdi. Oqýlyqqa degen tıisti qarajat bólinip, tek endi keıbir aýdandarǵa jetkizý jumystary júrgizilip jatqanyn tilge tıek etti.
Sondaı-aq, bıylǵy jańa oqý jylynda óńirde 16009 bala alǵash ret mektep tabaldyryǵyn attaıdy eken. Aıta keterligi, qazirgi tańda oblys boıynsha tolyq emes otbasylarda – 10564, qolaısyz otbasylarda – 472, kópbalaly shańyraqta – 20802 jáne turmysy tómen otbasylarynda 15065 mektep jasyndaǵy balǵyn tárbıelenedi.
Brıfıng sońynda bilim basqarmasynyń basshysy memlekettik mekeme, bıznes-qurylymdardy jáne úkimettik emes uıymdardy aksııaǵa belsendi qatysýǵa shaqyrdy.
Erjan BAITILES,
«Egemen Qazaqstan».
Qyzylorda oblysy.