Sıfrlyq baza aýyl mektepterinde áli de álsiz. Biraq Nura aýdanynyń Ahmet aýylyndaǵy bilim oshaǵy bul kedergige qarap otyrǵan joq. О́ıtkeni ınformatıka pániniń muǵalimi, jańashyl pedagog Anna Koltýnova alaqandaı aýyl mektebinde zamanaýı bilim berýdiń nátıjeli úlgisin kórsetti.
Bilikti ustaz Anna Koltýnovanyń birneshe joǵary bilimi bar, jetistigi de jetip artylady. Tájirıbeli pedagogke qaladaǵy bilim oryndarynan, tipti shetelden de shaqyrtý túsken. Alaıda ol óziniń týyp-ósken aýylyndaǵy Sáken Seıfýllın atyndaǵy mektepti tańdaǵan. Bar oılaǵany – aýyl mektebin damytý, balalarǵa tek qalada ǵana emes, aýylda da múmkindik bar ekenin kórsetý. Aıtqany oryndalyp keledi. Anna ınformatıka páninen eki tilde sabaq beredi.
El aýzyndaǵy muǵalimge ozyq tájirıbesimen bólisý maqsatynda birneshe memleketten shaqyrtý joldanǵan. Mınsk, Máskeý, Kıshınev qalalarynan tájirıbesi men avtorlyq ádistemelerin tanystyrýǵa usynys túsken. Alaıda otbasylyq jaǵdaıǵa baılanysty alys saparǵa shyǵa almaǵan. Qazir Astanada ótetin halyqaralyq ǵylymı-praktıkalyq konferensııaǵa shaqyrtý alyp otyr. Oǵan qatysyp, tájirıbesimen bólispekshi.
Ulttyq qundylyqtardy oqýshylardyń sanasyna sińirýde ustaz kóptegen qyzyqty ádis-tásil oılap tapqan. Sonyń biri – ustaz ben shákirtti jaqyndastyryp, balalardyń boıyna rýh darytqan «Syr sandyq» jobasy.
«Oqytý tek bilim berýmen shektelmeýge tıis. Ol jeke tulǵany damytyp, týǵan tilge, mádenıetke, ulttyq qundylyqtarǵa qurmet sezimin oıatýy qajet. Maǵan balalarǵa jaqyn, olarǵa emosıonaldyq áser qaldyratyn ári óz tamyrymen baılanysyn sezdiretin format kerek boldy. Osylaısha, dástúrli qazaq sandyǵynyń beınesi – «Syr sandyq» ıdeıasy týdy. Ár «syr» tek oqý materıalyn ǵana emes, sonymen birge úlkendi syılaý, Otanǵa degen súıispenshilik, adaldyq, eńbekqorlyq, jaýapkershilik sekildi qundylyqtardy ashady.
Joba aıasynda jasandy ıntellekt arqyly oqýshylarǵa ulttyq qundylyqtardy oıyn túrinde meńgertýge, tapsyrmalardy sheshýge, sheshim qabyldaýǵa, tańdaý jasaýǵa múmkindik beremin. Oqýshylar JI kómegimen mýltfılmder jasaıdy. Olar ári ssenarıst, ári rejısser retinde dástúr men tárbıelik máni joǵary áńgimelerdi ómirge ákeledi. Bul tásil shyǵarmashylyq oılaýdy damytyp qana qoımaı, vızýaldy obrazdar arqyly materıaldy tereńirek qabyldaýǵa jol ashady. Sondaı-aq bastaýysh synyp oqýshylaryna arnalǵan sıfrlyq kitaptar da jasaımyz.
«Syr sandyqtan» bólek, jasandy ıntellektige negizdelgen «AI Creator: Sıfrlyq shyǵarmashylyq álemi» kýrsyn, «Sıfrlyq kıiz úı», «Tiri mura», ınteraktıvti bilim berý kvestteri men oıyndar serııasyn ázirleımiz. Bul jobalardyń barlyǵy dástúr men tehnologııany toǵystyryp, ulttyq qundylyqtardy nasıhattaýǵa baǵyttalǵan», deıdi Anna.
Bilikti ustazdyń eńbegi men jańashyldyqqa umtylysy eskerilip, ol «Úzdik synyp jetekshisi – 2024» respýblıkalyq baıqaýynda top jaryp, «Úzdik pedagog» baıqaýynda birneshe márte júldeger atandy. Onyń jobalary ǵylymı konferensııalar men halyqaralyq jarystarda joǵary baǵalandy.
Pedagog tek sabaq berýmen shektelmeı, áriptesterine arnalǵan kásibı platforma qalyptastyryp, jasandy ıntellektini bilim berý úderisine engizýdiń tıimdi joldaryn usynyp keledi.
Aldaǵy josparynda ekitildi oqytýdy damytý, jasandy ıntellekt arqyly qazaq tilin meńgertýdiń jańa formattaryn engizý, «Aqyldy kıiz úı» jobasyn júzege asyrý jáne AR, VR tehnologııalaryn bilim salasyna beıimdeý bar. Osylaısha, qarapaıym aýyl mektebinde memlekettik til júıeli túrde damyp, zamanaýı sıfrlyq bilim berý keńistigi qalyptasyp keledi.
«Oqýshylar ózimen bir tilde, ıaǵnı tehnologııa tilinde túsinisetin, senimmen sóılesetin muǵalimge úıir. Búgingi muǵalim – tek bilim berýshi emes. Ol – shabyt berýshi, yntalandyrýshy, zertteýshi ári jańashyl tulǵa. XXI ǵasyr muǵalimi dástúrli qundylyqtardy zamanaýı tásildermen úılestire bilýi kerek. Qazirgi oqytý formalary, ınteraktıvti tapsyrmalar, jasandy ıntellektini qoldaný jáne oıyn ádistemeleri sabaqtyń qyzyqty ótýine yqpal etedi. Balalardyń barlyǵy sabaqqa belsendi qatysyp, óz pikiriniń mańyzdy ekenin jáne jeke tulǵa retinde baǵalanatynyn sezinedi», deıdi bilikti ustaz.
Qaraǵandy oblysy