ASTANA. 13 tamyz. Búgin Astanada hokkeıden Qazaqstan Prezıdentiniń Kýbogy úshin ótken jarys máresine jetti. Fınalda Vladıvostoktyń «Admıralyn» 3:2 esebimen jeńgen «Barys» komandasy týrnır jeńimpazy atandy. Bul týraly egemen.kz habarlady.
Oıyn jańadan ashylǵan muz saraıynda oınaldy. Alǵashqy kezeńde birneshe tamasha múmkindikter bolǵanymen, esep ashylǵan joq. Al kezdesýdiń ekinshi jartysynda jankúıerler tórt birdeı shaıbanyń kýási boldy. Aldymen aıdyn ıeleri esep ashty. Matchtyń 21-mınýtynda komanda kapıtany Brendon Bochenskı qarsylastardyń qaqpasynan sańylaý taýyp, mergendigimen kózge tústi. Arada 4 mınýt ýaqyt ótkende qonaqtar tarazy basyn teńestirdi. Nátıjeli soqqynyń avtory – Maksım Mamın.
Úzdiksiz shabýyldardyń nátıjesinde barystyqtar taǵy da esepte alǵa shyqty. 36-mınýtta soǵylǵan shaıba Evgenıı Rymarevtiń atyna jazyldy. Alaıda, bul jolǵy basymdyq 35 sekýnd qana saqtaldy. Bir mınýt ótpeı jatyp «Admıral» hokkeıshisi Konstantın Makarov taǵy da esepti teńestirip ketti.
Úshinshi kezeńde tablodaǵy esep ózgergen joq. Soǵan sáıkes komandalar qosymsha taımǵa júgindi. Bul synda «Barystyń» joly boldy. 63-mınýtta Roman Starchenko jeńis shaıbasyn soǵyp, komandasyna jeńis syılady. Osylaısha, elordalyqtar jańa maýsymdy jarqyn jeńispen bastady. Osy jeńistiń «Barystyń» bas jattyqtyrýshysy Erlan Saǵymbaev úshin de mańyzy zor ekeni belgili. Sebebi, bul onyń komandanyń bas jattyqtyrýshysy retinde resmı túrde qatysqan alǵashqy jarysy.
Oıyn barysynda «Barys» qaqpasyn Iаn Laso qorǵasa, «Admıral» sapynda Igor Bobkovqa senim artylǵanyn aıta keteıik.
Atalǵan saıysta júldeli úshinshi oryn Reseıdiń Hanty-Mansıısk qalasynan kelgen «Iýgra» komandasyna buıyrdy. Qola medal úshin bolǵan oıynda ol Novokýzneskiniń «Metallýrginen» 1:0 esebimen basym tústi.
Elaman Qońyr.
Derek: egemen.kz.
Sýret: vesti.kz.