ASTANA. 26 naýryz. Burnaǵy kúni nemistiń Germanwings kompanııasynyń Airbus A320 ushaǵymen birge opat bolǵan qazaqstandyq otbasy músheleri basynda basqa reıspen ushpaqshy bolypty. Bul týraly marqumdardyń jaqyndary sózderine silteme jasaǵan «Habar» telearnasy habarlady.
«О́skemende áriptesteri Aıjan Esenǵalıeva men onyń jaqyndarynyń ushaq apatynda qaza tabýlaryna qatty qaıǵyryp jatyr. «Kazsınk» kompanııasy marqumdardyń denelerin jetkizý men jerleýge ketetin shyǵyndardyń bárin ózine alýǵa daıyn», - delingen habarlamada.
Otbasynyń qaıǵyly jaǵdaıǵa qaza tapqan úsh múshesiniń de osy kásiporynǵa qatystary bar eken.
Búgin jumysqa shyǵýǵa tıis bolǵan Aıjan Esenǵalıevanyń kabıneti endi qańyrap tur. Ol ulynyń densaýlyǵyn túzetý úshin mereke kúnderi Eýropaǵa bes kúnge ushyp ketken eken. Áriptesteri onymen 5 kúnge ǵana qoshtasyp turmyz dep eseptegen. Al shyn máninde... máńgilikke bolyp shyqqan.
Kásiporynda qyzmet etetin Baqyt Smaǵulova óziniń basshysynan osy 5 kúnge ǵana qoshtasyp turǵandaryn estigen. Olar kóp jyldar boıy bir jerde qatar jumys ister kele jatqandarynda áriptestik sheńberinen de shyǵyp, ózara jaqsy dos bolyp ketken.
Endi Baqty budan bylaı Aıjannyń kabınetine kirip kelmeıtinine sene alar emes.
«Maǵan bul óte aýyr qaıǵy! Men eshteńe aıta alar emespin. Aıta almaımyn... Maǵan tipti aıtatyn sóz de joq... Bizdiń ony joǵaltyp alǵanymyzǵa sene alar emespin. Munyń bári qandaı jaman!», - dedi «Kazsınk» JShS bos ýaqyt jáne sport kesheniniń bas mamany B.Smaǵulova.
Aıjan Esenǵalıeva aınalasyndaǵy jurtqa shýaǵyn shashyp júretin qamqor adam bolypty. Sport saraıynyń, balalar lagerleri men demalys jaǵdaılary tikeleı onyń qamqorlyǵy arqasynda jolǵa qoıylyp kelgen kórinedi. Áriptesteri Aıjannyń kúıeýi men uly týraly da óte jaqsy pikirler bildirgen. Ádil kásiporynda myrysh óndirisiniń apparatshysy bolǵan, al Erbol Imanqulov «Jańa metallýrgııa» jobasynyń basynda turǵan, «Kazsınktiń» mys balqytý zaýytynyń dırektory bolyp istepti. Onyń kremnıı óndirisin kótermekshi bolyp Qaraǵandyǵa ketkenine bir jyldan endi asyp barady eken.
«Bizderdiń otbasymyzben birge demalyp turatyn kezderimiz de bolýshy edi. Olar shyn máninde naǵyz jaısań, ómirge qushtar jandar edi. Erboldyń ázil-qaljyńy taýsylmaıtyn, dombyra da tartatyn. Myna jaǵdaı bizdi teńseltip ketti», - dedi «Kazsınk» JShS dırektory Iýrıı Gýsev.
Dostary men týǵan-týystary bul otbasy músheleriniń nege myna reıske tap kelgenderin áli túsinbeıdi. Aıtýlarynsha, olar úıge basynda Frankfýrt arqyly qaıtyp kelmekshi bolypty. Shamasy, bıletti eń sońǵy sátte aýystyryp alǵan sııaqty.
Bulardyń qaıǵyly qazaǵa ushyraǵandaryna Erbol Imanqulovtyń úıde qalǵan anasy men olardyń qyzy Dana áli sener emes. Endi bular Fransııaǵa shuǵyl ushyp ketken Aıjannyń sińlisinen habar kútip otyr. Ol jaqyndaryn taný úshin shaqyrylǵan eken.
Murat Aıtqoja.