ASTANA. 26 naýryz. Amerıkanyń Florıda shtatyndaǵy Hadson qalasynda 13 jasar bala óziniń 6-daǵy inisin atyp óltirip, úlkenin jaraqattaǵan. Sodan keıin ózin óltirgen. Bul týraly Euronews habarlady.
Qandy oqıǵa oryn alǵan kezde úıde otbasynyń úsh balasy ǵana bolǵan. Úlkender úıde bolmaǵan. 13 jasar jasóspirim 6-daǵy inisin tapanshamen atyp óltirip, 16-daǵy aǵasyn jaraqattap tastaǵan. Sosyn shúrippeni ózine baǵyttaǵan. Polısııany jaraqattanyp qalǵan bala shaqyrǵan.
Okrýgtiń sherıfi Krıs Nokkonyń aıtýynsha, aǵaıyndy úsh bala as kezinde bir-birimen tamaqqa bola kelise almaı qalǵan.
«Balalardyń jasyn estigen kezde, bolǵan oqıǵanyń qanshalyqty sumdyq ekenin bile túsesiń, - dedi sherıf. - Áne, alty jastaǵy bala óziniń bólmesinde oınap otyrǵan. Sosyn talas týa salyp, ol ólip ketedi. Osy sumdyq kórinisti kórgen polıseıdiń ózine psıhologııalyq kómek kerek boldy».
«Otbasy Hadsondaǵy jyljymaly úıler saıabaǵyndaǵy treılerlerdiń birinde turǵan. Okrýg sherıfi Pasko Krıs Nokko jasóspirimniń keshki jeti jarymǵa taıaý ýaqytta oq atqanyn aıtady. Biraq atqan jasóspirim men onyń qurbany bolǵan inisiniń aty aıtylmaıdy. Al jaraqat alyp qalǵan úlkeni aýrýhanaǵa jetkizilgen. Onyń ómirine tónip turǵan qaýip joq. Balalar sol kezde úıde ózderi qalǵan. Olardyń anasy jumysta bolǵan. Balalardyń 18-degi aǵasy da syrtqa shyǵyp ketken. Qalǵan úsh bala tamaq iship otyryp, bir nársege kelise almaǵan. Sol kezde olardyń ortanshysy tapansha alyp kelip, qalǵan ekeýin atqan. Sońynan bir oqty ózine jumsaǵan. Ázirge bul úıge qarýdyń qaıdan kelgeni, onyń kimdiki ekeni belgisiz», - dep habarlady Amerika.Ru.com.
AQSh-ta balalarǵa otty qarýdy ustaı bilý kóp jaǵdaıda erte bastan úıretiledi. О́tken jylǵy tamyzda Arızona shtatynda 9 jasar qyz ÝZI tapansha-pýlpemetin qolynda ustap tura almaı, ózine atýdy úıretip turǵan nusqaýshyny ólimshi etip jaraqattady.
Amerıkada otty qarýdyń taraý deńgeıi tipti avtomobıldiń tanymaldylyǵynan da joǵary. Qazir AQSh-taǵy 315 mln. adamnyń qolynda 270 mıllıonǵa jýyq otty qarý bar. Bylaısha aıtqanda, bul – árbir 100 amerıkalyq azamattyń 89-y qarýlanyp alǵan degen sóz.
Murat Aıtqoja.
Mánbe, sýret: Euronews.