Elordada Taldau Run dástúrli sporttyq is-sharasy ótti. Júgirýge 400-den asa salamatty ómir saltyn dáriptep júrgen belsendi azamattar qatysty. Olardyń qatarynda Parlament depýtattary men memlekettik jáne qoǵamdyq uıymdardyń, taldaý qurylymdarynyń ókilderi bar.
Senat tóraǵasy Máýlen Áshimbaev atap ótkendeı, Memleket basshysynyń bastamasymen búginde barlyq salada keshendi ózgerister júrgizilip jatyr. Jańa Konstıtýsııa memlekettik basqarýdyń zamanaýı ári tıimdi úlgisine kóshýin qamtamasyz etý jáne azamattardyń elimizdiń qoǵamdyq-saıası ómirine qatysý quqyqtaryn keńeıtý jónindegi reformalardyń naqty nátıjesi ekeni sóz boldy.
M.Áshimbaev osyndaı is-sharalarǵa qatysý naǵyz azamattyq belsendiliktiń jarqyn kórinisi ekenin aıtty. Bul – sanaly jáne jaýapty azamattyq ustanymdy qalyptastyrý jolyndaǵy mańyzdy qadam.
«Prezıdent Qasym-Jomart Toqaevtyń Jarlyǵymen 15 naýryzda jańa Konstıtýsııa jobasyna baılanysty respýblıkalyq referendým ótedi. Osy oraıda basty nársege nazar aýdarýymyz kerek. Iаǵnı túpkilikti sózdi halyq aıtady. Sondyqtan árkim óz ustanymyn bildirip, elimizdiń bolashaǵyn aıqyndaıtyn referendýmǵa qatysý erekshe mánge ıe. Búgin osylaı belsendi, synı oılaı alatyn, el erteńine beıjaı qaramaıtyn ortada jańa Konstıtýsııa týraly aıtýymyzdyń sımvolıkalyq maǵynasy tereń dep esepteımin. Sizderdiń árqaısyńyz aınalańyzdy jasampazdyqqa shaqyryp, úlgi kórsetip kelesizder. Muny aldaǵy jańarýlarǵa yqpal etetin yntalandyrýdyń ozyq úlgisi dep qabyldaımyz», dep Senat tóraǵasy qala ákimdigine sporttyq is-sharany uıymdastyrýǵa qoldaý kórsetkeni úshin alǵysyn bildirdi.