Astanadaǵy Ulttyq akademııalyq kitaphanada «Tátti ertegi» jobasy aıasynda jaryq kórgen «Shahmatshy Qonjyq» atty balalar kitabynyń tanystyrylymy ótti. Is-sharaǵa pedagogter, ata-analar, kitaphana ókilderi jáne jas oqyrmandar qatysty.
«Shahmatshy Qonjyq» poetıkalyq ertegisi 4-12 jas aralyǵyndaǵy balalarǵa arnalǵan. Zamanaýı ertegi balanyń tilin damytýǵa, oılaý qabiletin jetildirýge, emosııalyq mádenıeti men qundylyqtaryn qalyptastyrýǵa baǵyttalǵan.
Joba avtory, lıngva-pedagog Larısa Aldabergenniń aıtýynsha, «Tátti ertegi» bastamasy 2024 jyly áleýmettik joba retinde dúnıege kelgen.
«Buǵan sebep – bir ǵana balanyń «Anashym, maǵan ertegi oqyp bershi» degen bir aýyz sózi. Mektepter men balabaqshalardy aralap, qandaı ertegiler oqylyp jatqanyn saralaǵanda, bir baıqaǵanymyz – kóptegen týyndy shet tilinen aýdarylǵan. Osylaısha, biz qazaq tilinde jazylǵan, ulttyq negizi bar jańa ertegi qajet degen sheshimge keldik. Sodan soń aqyn, jýrnalıst Baıtanaǵalı Tólentaevtyń 72 shýmaqtan turatyn osy poemalyq ertegisi nazarymyzǵa ilikti. Ata-analarmen aqyldasa kele, qazaqsha jazylǵan jańa keıipker – Qonjyqty balalar ádebıetine engizýdi jón kórdik», deıdi joba avtory.
Kitap ıllıýstrasııasyna alty aı ýaqyt jumsalǵan. Sýretshi Jansaıa Damys ár keıipkerdiń beınesin bala-nyń qabyldaýyna saı etip jasaǵany kórinip-aq tur. Joba eki jyl boıy saraptamadan, Oqý-aǵartý mınıstrliginiń qosymsha bilim berý departamenti mamandarynyń talqylaýynan ótken. Aıta keteıik, bul bastama «Táp-tátti» kondıterlik uıymynyń qoldaýymen júzege asyp, keıin jobaǵa halyqaralyq «Qazaq tili» qoǵamynyń Astana qalalyq fılıaly men halyqaralyq túrki tildes muǵalimder uıymy seriktes retinde qosylǵan. Búginde kitap 30-dan astam bilim uıymynda qoldanysqa engen. Joba jetekshisiniń aıtýynsha, Italııa men Germanııada osy kitaptyń tusaýkeserin ótkizý josparlanyp otyr. Aǵylshyn tilindegi nusqasy da daıyn kórinedi. Búginde «Tátti ertegi» jobasynyń aınalasynda 40-qa jýyq pedagog pen erikti toptasqan. Uıymdastyrýshylar aldaǵy ýaqytta «Tátti kitaptar» serııasyn jalǵastyrýdy kózdep otyr.