Elordamyzdyń tórinde túrki áleminiń mádenı baılanystaryn nyǵaıtýǵa arnalǵan mańyzdy is-shara ótti. Qazaq óneriniń álemdik sahnadaǵy mártebesin taǵy bir márte dáleldegen jıynda Qazaqstannyń halyq ártisi Dımash Qudaıbergen men Halyqaralyq Kann kınofestıvaliniń jeńimpazy Samal Eslıamova TÚRKSOI halyqaralyq uıymynyń joǵary marapatyna ıe boldy.
Atap aıtsaq, Dımash Qudaıbergen túrki álemi mádenıetin damytýǵa qosqan eleýli úlesi úshin uıymnyń eń joǵary nagradasy sanalatyn «Túrki áleminiń mádenı elshisi» ordenimen marapattaldy. Bul Dımashtyń mýzyka arqyly halyqtardy biriktirýi, mádenı dıplomatııalyq mıssııany atqarýy qazir tek elimizde ǵana emes, búkil túrki áleminde tanylǵanyn kórsetedi.
Sonymen qatar Qazaqstannyń eńbek sińirgen qaıratkeri, aktrısa Samal Eslıamova túrki jáne álemdik kıno óneriniń damýyna qosqan aıryqsha úlesi úshin «Túrki áleminiń úzdik ártisi» atalymy boıynsha TÚRKSOI arnaıy júldesine ıe boldy. Samaldyń ekrandaǵy tabıǵı talanty – otandyq kınematografııanyń aıtýly tabysy.
Premer-mınıstrdiń orynbasary – Mádenıet jáne aqparat mınıstri Aıda Balaeva atynan óner ıelerin quttyqtaǵan Mádenıet jáne aqparat vıse-mınıstri Aıbek Sydyqov qos talanttyń eńbegin túrki álemi elderi arasyndaǵy mádenı baılanysty nyǵaıtýǵa, qazaq ónerin halyqaralyq deńgeıde tanytýǵa zor úles qosyp otyrǵanyn atap ótti. Al TÚRKSOI uıymynyń Bas hatshysy Sultan Raev marapattardyń mańyzyna toqtalyp, qazaqstandyq mádenıet qaıratkerleriniń ortaq túrki mádenı keńistigin nyǵaıtýdaǵy róli týraly aıtty:
«Búgin biz óner arqyly túrki álemin shynaıy biriktirip júrgen tulǵalardy qurmettep otyrmyz. Dımash Qudaıbergen mýzyka arqyly mádenı elshi mıssııasyn atqaryp keledi. Al Samal Eslıamova qazaqstandyq kıno óneriniń rámizine aınaldy. Bul marapattar – olardyń eńbegine berilgen laıyqty qurmet», dedi TÚRKSOI Bas hatshysy.
О́z kezeginde Dımash Qudaıbergen marapatty zor rızashylyqpen qabyldaı otyryp, óner adamy úshin eń úlken marapat halyqtyń qoldaýy ekenin atap ótti.
«О́ner adamy úshin eń joǵary marapat – halyqtyń moıyndaýy men qoldaýy. Bul qurmetti men elderimiz arasyndaǵy dıplomatııalyq qarym-qatynastardyń nyǵaıýyn bildiretin mańyzdy belgi retinde qabyldaımyn. Sondyqtan da aıtýly marapatty jeke ózime emes, búkil qazaq halqyna kórsetilgen qurmet pen iltıpat dep bilemin», dedi ánshi.
Aıta keteıik, Dımash – bul marapatqa ıe bolǵan ekinshi tulǵa. Buǵan deıin mundaı ataq Túrkııanyń Nobel syılyǵynyń laýreaty, professor Azız Sandjarǵa berilgen bolatyn.