Atyraý oblysynda ıeliginde kóligi bar keı turǵyndar salyǵyn tólemeı júr. Sondaı-aq balalaryna alıment tóleýdi umyt qaldyrǵandar da bar.
Oblystyq memlekettik kirister departamenti basshysy orynbasarynyń mindetin atqarýshy Bısen Iýsýbalıevtiń deregine súıensek, ıeliginde kóligi, ne ózge múlki bar turǵyndarǵa salyqty mezgilinde tólemese, aldymen habarlama jiberiledi. Al ótelmegen bereshek úshin salyq buıryǵy shyǵarylyp, is jeke sot oryndaýshylaryna joldanady. Keıin májbúrli túrde óndirip alý sharasy qoldanylady.
«Salyqty ýaqytynda tóleý – ár adamnyń mindeti. Qazir 4 246 jeke tulǵanyń kólik salyǵyna 321 mln teńge bereshegi bar. Onyń 226 mln teńgesi – negizgi qaryz, keshiktirgeni úshin qosylǵan aqsha 95 mln teńgeni qurady. Al 10 415 adamnyń múlik salyǵyna 50 mln teńge bereshegi qalyptasyp otyr», deıdi Bısen Iýsýbalıev.
Basshy orynbasarynyń pikirinshe, endi jeńil kóliktiń zaýyttan shyǵarylǵanyna 10 jyldan assa, salyq 30 paıyzǵa tómendeıdi. Al 20 jyl burynǵy kólikterdiń salyǵy eki ese azaıady.
«Sharýa qojalyqtarynyń ıeleri bir pıkap kóligi úshin salyq tólemeıdi. Biraq qymbat múlikke qatysty jańa salyq tártibi engizildi. Eger bir adamnyń ıeligindegi úıiniń, ǵımarat pen basqa da múlkiniń jalpy quny 450 mln teńgeden joǵary bolsa, osy somadan asqan bóligine 2 paıyz qosymsha salyq salynady. Múlik quny neǵurlym qymbat bolǵan saıyn tólenetin salyq ta soǵurlym kóbeıe túsedi», dep málim etti B. Iýsýbalıev.
Oblystyq ádilet departamentiniń bólim basshysy Aqbóbek Dúsipqalıevanyń deregine súıensek, alımentin tólemeı júrgen 3 myńnan astam adam bar. Olardyń bereshegi 3 mlrd teńgeden asyp otyr.
«Jeke sot oryndaýshylarynda alımentti óndirýge qatysty 10 myńnan astam atqarý qujaty bar. Onyń ishinde 5 myń iske qatysty alıment tólemi boryshkerlerdiń jumys ornynan ustalady. Qazir 2 myńǵa jýyq boryshker alımentti erikti túrde, alaıda ishnara tólep júr. Alımentke bereshegin múldem tólemegen boryshkerlerdiń sany – 260. Bizdiń oblysta alımentti tóleýshiler qatarynda 28 áıel bar», deıdi Aqbóbek Dúsipqalıeva.
Onyń málimetinshe, boryshkerlerdi jumys ornalastyrý maqsatynda 6 ret jármeńke uıymdastyrylypty. Sondaı jármeńkeden soń 617 boryshker jumysqa ornalasqan. Turaqty jumys tapqan boryshkerlerdiń arasynda alıment bereshegin tólemegen 542 adam bar.
Atyraý oblysy