Italııanyń Mılan, Kortına-d’Ampesso qalalarynda XIV qysqy Paralımpıada oıyndary ótip jatyr. Elimizdiń ulttyq quramasy parashańǵy men parabıatlon sport túrlerinen dodaǵa túsip jatyr.
Italııadaǵy qysqy Paralımpıada 16 naýryzda máresine jetedi. Mılan men Kortına qalalarynda 56 elden kelgen 600-den astam parasportshy 79 medal jıyntyǵyn sarapqa salyp jatyr. Elimizdiń úmitin arqalaǵan jeti sańlaq: Erbol Hamıtov, Aleksandr Gerlıs, Iýrıı Berezın, Vladıslav Kobal, Sergeı Ýsolsev, Anna Gracheva, Nurlan Álimov baq synaýda. Sportshylardyń arasynda jasy kishisi – Vladıslav Kobal. 17 jastaǵy sańlaq parashańǵydan jarys jolyna shyǵady. Tájirıbeli Sergeı Ýsolsev – egde sportshy, 51 jasta.
Paralımpıadanyń altynshy kúninde qanjyǵamyzǵa alǵashqy medal baılandy. Erbol Hamıtov parashańǵy saıysynan 1 500 metrge klassıkalyq sprıntte qola júlde oljalady. Ol márege 2 mınýt 29 sekýndta jetti. Bul qashyqtyqta Paralımpıadanyń altyn medalin Qytaı sportshysy Lıý Szysıý ıelense, kúmis medal Brazılııa parashańǵyshysy Krıstıan Vestemaıerge buıyrdy.
«El senimin arqalap barǵan tórtjyldyq dodasynda qola medal enshilep, jankúıerlerimniń úmitin aqtaı aldym dep oılaımyn. Bul medal – uzaq jylǵy eńbektiń jemisi», deıdi E.Hamıtov.
Erbol parasportpen 2018 jyldan beri shuǵyldanady. Ol 2022–2023 jylǵy qysqy maýsymda parabıatlon men parashańǵydan álem kýbogi kezeńinde birneshe ret jeńiske jetti. Álem chempıonatynda top jardy. Ári el sportynyń tarıhynda osy sporttan jahandyq alamannyń tuńǵysh jeńimpazy atandy. Buǵan deıin bul meje sańlaqtarymyzǵa asý bermeı kelgen edi. Erbol 2024–2025 jylǵy maýsym qorytyndysynda parabıatlonnan álem kýboginiń jalpy esebinde úzdik atanyp, 31 jyldan keıin mártebeli syılyq – Hrýstal globýsty ıelendi. Endi, mine, Mılan tórinde ótip jatqan qysqy Paralımpıada alamanynda jeńis tuǵyrynan kórinip, kók týymyzdy jelbiretti.
Elimizdiń sportshylary qysy Paralımpıada oıyndaryna 1994 jyldan beri qatysyp keledi. Buǵan deıin 1994 jyly Lıllehammerde (Norvegııa) ótken qysqy Paralımpıada alamanynda Lıýbov Vorobeva parashańǵydan 10 shaqyrymǵa klassıkalyq stılmen júıtkýde kúmis medal enshiledi. Aleksandr Kolıadın 2018 jyly Phenchhandy (Ońtústik Koreıa) dúbirge bólegen qysqy Paralımpıada saıysynda parashańǵydan 1,5 shaqyrymdyq sprıntte chempıon atanyp, altyn medal oljalady. 2022 jyly Beıjińde (Qytaı) ótken qysqy Paralımpıada saıysynda Aleksandr Gerlıs parabıatlonnan (10 shaqyrym) qola medal enshiledi.