Búgin Astanada ótken «Ádiletti jáne Progressıvti Qazaqstannyń Halyqtyq Konstıtýsııasy úshin!» Jalpyulttyq koalısııasynyń otyrysynda Memlekettik keńesshi Erlan Qarın aldaǵy referendýmnyń mańyzy men jańa Ata Zańnyń fılosofııasyna toqtaldy. Ol ulttyq birlik pen halyq senimi reformalardyń basty qozǵaýshy kúshi ekenin aıtty, dep jazady Egemen.kz.
Memlekettik keńesshi sózin el birligine qyzmet etýdiń qadir-qasıetin aıqyndaýdan bastady.
«Osydan úsh jyl buryn Qazaqstan halqy Assambleıasynyń kezekti sessııasynda Memleket basshysy: «El birligin nyǵaıtý úshin qyzmet etý – eń jaýapty ári saýapty is», – degen edi. Prezıdenttiń osy sózin túrli jıyndarda únemi qaıtalap júremin. Birlikte jáne birlikke qyzmet etý – jaqsylyqtyń eń abzaly. О́ıtkeni jumylyp istegen istiń paıdasy da, nátıjesi de orasan bolady», dedi Erlan Qarın.
Memlekettik keńesshi Konstıtýsııalyq reformanyń uzaq ýaqyt boıy jan-jaqty talqylanǵanyn, bul qujattyń búkilhalyqtyq sıpatyn erekshe atap ótti.
«7 aıdan astam ýaqyt boıy daıyndalyp, pysyqtalǵan Konstıtýsııalyq reforma – qoǵam birligi men halyq yntymaǵynyń aıǵaǵy. Bul jańa Ata zańdy ázirleýge myńdaǵan adam qatysty. Sondyqtan Jańa Konstıtýsııa elimiz úshin berekeli qujat bolady dep senemin», dedi ol.
Erlan Qarın: Konstıtýsııalyq ózgerister halyq múddesine qyzmet etedi
Buǵan qosa, Erlan Qarın óńirlerdegi kezdesýlerge toqtalyp, halyqtyń reformalarǵa degen yqylasy men Memleket basshysyna degen senimin atap ótti.
«Azamattarymyzdyń basym bóligi jańa Konstıtýsııany qoldap otyr. Bul qoldaýdyń ózeginde – Memleket basshysyna jáne onyń bastamasymen júzege asyrylyp jatqan ózgeristerge degen úmit bar. Eger halyq bılikke senbese, reformalardy bastaý da qıyn bolar edi. Tek halyqtyń qoldaýy bizge osyndaı júıeli ózgeristerdi jasaýǵa kúsh berip otyr», dedi Erlan Qarın.
Sonymen qatar Memlekettik keńesshi qoǵamdaǵy pikir alýandyǵyna toqtalyp, reformany synaýshylarǵa qatysty óz oıyn bildirdi.
«Búginde elimizdiń ár azamaty óz oıyn, óz pikirin erkin aıtýǵa quqyly. Sondyqtan, búginde bolyp jatqan ózgeristerdi bireýler qoldaıdy, bireýler syn aıtady, bireýler suraq qoıady. Bul – biz qurýǵa umtylǵan ashyq qoǵamnyń belgisi. Biraq sol syn aıtyp júrgender ulttyq biregeılikke, aýmaqtyq tutastyqqa nemese dástúrli qundylyqtardy qorǵaýǵa baǵyttalǵan normalarǵa qarsy bolǵandaryn túsine me?!», dedi ol.
Erlan Qarın Prezıdenttiń nege Táýelsizdik pen Egemendik sózderin bas árippen jazatynyn túsindirdi
Erlan Qarınniń aıtýynsha, osyndaı taǵdyr sheshti sátte tutas qoǵamdy artqa tartý – durys emes. Ol jańa Konstıtýsııanyń basty mıssııasy – saıası kózqarasyna qaramastan, árbir qazaqstandyqtyń quqyǵyn teń qorǵaý ekenin túsindirdi.
«Túptiń túbinde jańa Konstıtýsııa ony qoldaǵandardy da, kúmán keltirgenderdi de báribir birdeı qorǵap, teń kepildik beredi. Erteń bir azamatymyz álemniń bir shetinde qıyn jaǵdaıǵa ushyrasa, memleket ony jalǵyz qaldyrmaıdy. «Ár qazaq – jalǵyzym» degen ulttyq uranymyz endi «Ár azamat – basty qundylyq» degen konstıtýsııalyq qaǵıdatqa aınaldy», dep naqtylady Memleket keńesshi.
Jańa Ata zańda «adam» sózi 76 ret kezdesedi: Erlan Qarın jańa Konstıtýsııa jobasynyń basty ereksheligin atady
Sóz sońynda Erlan Qarın referendým ótkiziletin kúndi Jańarý kúni dep atap, onyń tarıhı mańyzyna nazar aýdardy.
«15 naýryz – bul tek referendým kúni emes, bul – Jańarý kúni. Eger azamattarymyz qoldasa, biz jańa dáýirge aıaq basamyz. Adamdar turǵyn úıden zańsyz shyǵarylmaıdy, jeke derekter qorǵalady, egemendiktiń ıesi halyq bolyp tanylady. Jańa Konstıtýsııa úlken jańashyldyqtardyń, berekeli isterdiń bastaýy bolsyn!», dep túıindedi Memlekettik keńesshi.