Shymkent qalasynda referendým naýqany erekshe bastaldy. Azamattyq belsendilik tanytyp, alǵashqy bolyp óz ýchaskelerinde daýys bergen azamattarǵa syılyqtar tabystaldy.
Máselen, №100 referendým ýchaskesinde alǵashqy bolyp daýys bergen Oljabaı Dúzúlbaevqa belsendi azamattyq ustanymy úshin arnaıy syılyq tabystaldy. Al Shymqaladaǵy Dostyq úıinde ornalasqan №4 referendým ýchaskesine kelgen daýys berýshilerge qalalyq Qazaqstan halqy Assambleıasynyń músheleri shashý shashyp, kóterińki kóńil kúı syılady.
Shymkent qalasynda referendýmǵa baılanysty qoǵamdyq kólikter jolaýshylardy tegin tasymaldady. Bul sheshim qala turǵyndarynyń daýys berý ýchaskelerine yńǵaıly jetýine múmkindik berý maqsatynda qabyldandy.
Shahardaǵy ákimshilik aýmaqtarda referendýmǵa ázirlik joǵary deńgeıde uıymdastyryldy. Máselen, qalanyń Ál-Farabı aýdanyndaǵy 78 referendým ýchaskesi óz jumysyn tańǵy saǵat 7.00-de bastady. Aýdandaǵy jalpy saılaýshylar sany – 120 202 adam. Barlyq referendým ýchaskesi zań talaptaryna sáıkes tolyq jabdyqtalyp, daýys berý jáshikteri óz ýaqytynda ashyldy.
Qala turǵyndary tańerteńnen bastap óz ýchaskelerine baryp, azamattyq ustanymdaryn bildirdi. Qoǵamdyq kólikterde daýys berýge bara jatqan jolaýshylar referendýmnyń el bolashaǵy úshin mańyzdylyǵyn atap ótip, barsha turǵyndardy belsendi túrde qatysýǵa shaqyrdy.
ShYMKENT