Qazaqstan Halyq partııasy 15 naýryzda ótken jańa Konstıtýsııa jobasy boıynsha respýblıkalyq referendýmnyń qorytyndysyna qatysty resmı úndeý jasady, dep habarlaıdy Egemen.kz.
«Qurmetti qazaqstandyqtar! 2026 jylǵy 15 naýryzda shyn máninde tarıhı oqıǵa boldy. Qazaqstandyqtar respýblıkalyq referendýmǵa belsendi qatysyp, Ádiletti Qazaqstanǵa jol bastaıtyn Halyqtyq Konstıtýsııany qoldady. Árqaısymyz azamattyq boryshymyzdy oryndap, Progress pen Ádilettiliktiń jańa jolyna daýys berý arqyly azamattyq ustanymymyzdy bildirdik.
Jańa Konstıtýsııa Qazaqstan Respýblıkasy qyzmetiniń negizgi qaǵıdattaryn keńeıtedi. Endi konstıtýsııalyq qurylymnyń negizin mynadaı qaǵıdattar quraıdy: Egemendik pen Táýelsizdikti qorǵaý; adam men azamattyń quqyǵy men bostandyǵyn saqtaý; zań men tártiptiń ústemdigin qamtamasyz etý; jalpyulttyq birlikti nyǵaıtý; halyqtyń ál-aýqatyn arttyrý; jaýapty, jasampaz patrıotızm ıdeıasyn ilgeriletý; qoǵamdyq dıalogty damytý; eńbekqorlyq, progress jáne bilim qundylyqtaryn ornyqtyrý; joǵary ekologııalyq mádenıet qalyptastyrý; tarıhı-mádenı murany saqtaý; ulttyq mádenıetti qoldaý. Bul jańashyldyqtar jańa baǵdar beredi: endi memleket úderisterdi basqarýǵa ǵana emes, azamattarǵa qyzmet etýge mán beredi; biz maqsat pen tilekti resmı deklarasııalaýdan naqty nátıjege baǵyttalǵan júıelik qaıta qurýǵa kóshemiz», delingen partııanyń úndeýinde.
Jańa Konstıtýsııa bıliktiń múlde jańa arhıtektýrasyn qalyptastyrady. Konstıtýsııa bılik aýysqan kezde júıelik táýekelderdiń deńgeıin tómendetýge baǵyttalǵan jańa Vıse-prezıdent ınstıtýtyn engizýdi kózdeıdi. Bir palataly Parlament – Quryltaı qurylady, ol proporsıonaldy negizde qalyptasady. Bir palataly Parlamentke arnalǵan proporsıonaldy saılaý júıesi saıası partııalardy nyǵaıtýǵa jáne olardyń memlekettik saıasatqa yqpalyn arttyrýǵa yqpal etedi. Mundaı zań shyǵarýshy organ sapalyq turǵydan jańa partııalyq-saıası pikirtalas úderisin bastaıdy. Bul saıası partııalardy áleýetti qoldaýshylarmen dıalog ornatýdyń jańa túrin belsendi izdeýge, sondaı-aq azamattardyń áleýmettik-ekonomıkalyq jáne mádenı suranysyn neǵurlym dál eskerýge yntalandyrady.
Konstıtýsııada Joǵarǵy konsýltatıvtik jańa organ – Halyq Keńesine arnalǵan bólim bar, onyń qyzmeti jeke Konstıtýsııalyq zańmen retteledi. Jańa ınstıtýt ártúrli áleýmettik jáne etnıkalyq toptardyń múddelerin erkin qalyptastyrýǵa jáne aıqyndaýǵa, olardy úılestirýge jáne eldiń ishki saıasatyna engizýge, sondaı-aq aımaqtyq máselelerdi, onyń ishinde zań shyǵarý bastamalary arqyly sheshýge yqpal etedi. Osylaısha zań shyǵarý úderisine taǵy bir sýbekt qosylady, ol halyqtyń «daýysy» bolady.
«Qazaqstan Halyq partııasy áleýmettik ádilettilik ıdeıasyna adaldyq tanyta otyryp, jańa Konstıtýsııanyń kirispesi men jalpy erejelerinde alǵash ret «Ádiletti Qazaqstan» uǵymynyń memlekettik damýdyń irgeli ólshemi retinde bekitilýi erekshe mańyzǵa ıe dep sanaıdy. Ádiletti Qazaqstan – bul «Zań men Tártip» ustanymyn sózsiz ustaný. Bul teń múmkindik jáne kepildendirilgen quqyq pen bostandyqqa ıe qoǵam, munda mindet adamnyń quqyǵy men bostandyǵy sııaqty bir-birinen ajyraǵysyz bolady», delingen referendýmnyń qorytyndysy týraly resmı úndeýde.
Qyrǵyzstan OSK tóraǵasy: Qazaqstandaǵy referendým joǵary azamattyq belsendilikpen ótti
Partııa ókilderiniń aıtýynsha, jańa Konstıtýsııa Qazaqstandy tikeleı áleýmettik memleket dep kórsetedi. Mundaı aıqyn ustanym memlekettiń tek josparlap qana qoımaı, naqty áreket etetinin bildiredi, ıaǵnı quqyq pen bostandyqtyń naqty kepildikterin qamtamasyz etedi: eń tómengi jalaqy men laıyqty zeınetaqy kepildikteri, naýqastanyp qalǵanda, múgedektik taǵaıyndalǵanda nemese asyraýshysynan aıyrylǵan jaǵdaıda áleýmettik qorǵaý kepildikteri.
«Jańa Konstıtýsııa otbasyn, ana men balany qoldaıdy, qoljetimdi bilim berý men kepildendirilgen medısınalyq kómek kólemin qamtamasyz etedi. Jańa Konstıtýsııa adamnyń ómirindegi qıyn kezeńde ony qorǵaıtyn naqty tetikterdi qalyptastyrady.
Jańa Negizgi zań konstıtýsııalyq deńgeıde azamattardyń eńbek etý quqyǵyn bekitip, eńbekti – joǵary qundylyqqa, al jumysshylardyń áleýmettik qorǵalýyn – memlekettiń mindetine aınaldyrady.
Túsiný mańyzdy: Demokratııa men quqyqtyq memleket tolyqqandy bolý úshin áleýmettik negiz qajet. Jańa Konstıtýsııa quqyqtyq memlekettiń demokratııalyq ustanymdary men men azamattardyń áleýmettik kepildikteriniń arasyndaǵy tepe-teńdikti tolyq qamtamasyz etedi.
Jańa Negizgi zań halyqtyń erkimen aıqyndalǵan elimizdiń jańa maqsattary men mindetteriniń jańa beınesin qalyptastyrady. Jańa Konstıtýsııa – adamdy, quqyq pen bostandyqty jáne elimizdiń Egemendigi men Táýelsizdigin qorǵaýǵa baǵyttalǵandyǵymen erekshelenedi. Osylaısha jańa Konstıtýsııa Negizgi zańnyń mátini men rýhyn shynaıy ómir talabymen úılestiredi.
Júrgizilgen Konstıtýsııalyq reformanyń jáne sonyń nátıjesinde ótken referendýmnyń qorytyndysy boıynsha jańa Konstıtýsııanyń ıdeıalyq shabyttandyrýshysy jáne bastamashysy – Prezıdent Qasym-Jomart Kemeluly Toqaev, al birlesken avtory halyq dep senimdi túrde aıtýǵa bolady. Demek, jańa Konstıtýsııa – Halyqtyq Konstıtýsııa, al konstıtýsııalyq reforma men ótken referendým Qazaqstandaǵy bıliktiń qaınar kózi – óziniń ótkenin tanyp, búginin túsine otyryp, elimizdiń bolashaqtaǵy jańa kelbeti týraly tarıhı durys sheshim qabyldaǵan halyq ekenin kórsetetin negizgi faktor. Qazaqstan Halyq partııasy jańa Konstıtýsııany qabyldaý boıynsha referendýmnyń nátıjesin tolyq qoldaıdy jáne barlyq qazaqstandyqtardy Qazaqstannyń Ádiletti jáne Progressıvti bolashaǵy úshin birigýge shaqyrady», delingen úndeýde.
Respublica partııasy respýblıkalyq referendým qorytyndysy boıynsha málimdeme qabyldady