Keshe Ortalyq saılaý komıssııasynda bolǵan kezekti brıfıngte Ortalyq saılaý komıssııasynyń qaýlysymen belgilengen prezıdenttik saılaýdy ázirleý men ótkizý jónindegi negizgi is-sharalardyń Kúntizbelik jospary málim etildi.
Ortalyq saılaý komıssııasynyń hatshysy Baqyt Meldeshov: «Saılaý zańnamasynyń eń mańyzdy talaby – saılaý úderisine qatysýshylar úshin teń quqyqtar men jaǵdaılardy qamtamasyz etý. Saılaý týraly Konstıtýsııalyq zańda saılaý aldyndaǵy úgit 4 baptan turady, jáne oǵan 5 taraý arnalǵan. Zańnamalyq turǵydan alǵanda, saılaý aldyndaǵy úgit – saılaýshylardyń belgili bir kandıdatty, saıası partııany jaqtap nemese qarsy daýys berýge qatysýǵa túrtki bolý maqsatyndaǵy qyzmet», deı kelip, Kúntizbelik josparǵa saı saılaýaldy úgit júrgizýge 30 kún bekitilgenin, ol 26 naýryzdan bastalyp, 24 sáýir kúni saǵat 00.00-de aıaqtalatynyn jetkizdi. Saılaý qarsańyndaǵy kúnde jáne saılaý kúninde kez kelgen úgitke tyıym salynatynyn aıtqan ol birqatar memlekettik organ qyzmetkerlerine saılaýaldy úgit-nasıhat jumystaryn júrgizýge zań aıasynda tyıym barlyǵyn da qaperge saldy.
«Elimizdiń saılaý týraly zańnamasyna sáıkes memlekettik organdarǵa úgit jumysyn júrgizýge tyıym salynady. Laýazymdy qyzmette otyrǵan azamattar da óz qyzmetin paıdalanyp, úgit júrgizbeýi tıis. Sonymen qatar, áskerı qyzmetshilerge, UQK, sot, prokýratýra, Ishki ister mınıstrliginiń qyzmetkerlerine, OSK múshelerine úgit jumystaryn júrgizýge bolmaıdy», degen Baqyt Meldeshov kandıdattardyń senim bildirilgen adamy retinde de ózderiniń qyzmetterin paıdalanyp, qaramaǵynda jumys isteıtin azamattardy úgit jumysyna tartýǵa bolmaıtynyn jáne úgit jumysynda, saılaýshylarmen kezdesý barysynda tegin taýarlar taratyp, lotereıalar oınatýǵa zań júzinde eshqandaı ruqsat joqtyǵyn qadap aıtty.
Sonymen qatar, OSK hatshysy, úgit jumysyn júrgizgen kezde kandıdattar óziniń úgit plakattarynda elimizge esimi belgili azamattardyń sýretin ol tulǵanyń kelisimin alǵan kúnde jarııalaý quqyǵy barlyǵyn, al kelisimi bolmaǵan jaǵdaıda mundaı plakattardyń ilinýine tyıym salynatynyn jetkizdi. Buǵan qosa, plakatty jasaǵan kezde onyń tómen jaǵynda qandaı qarajatqa bastyrylyp, qandaı baspadan shyǵarylǵany kórsetilýi qajet, degen ol saılaý kúninde saılaý ýchaskesiniń ishinde áleýmettik saýaldama júrgizýge bolmaıtynyna da mán berdi. Barlyq saılaýaldy úgit jumystarynyń tek zań aıasynda júrgizilýi tıistigin aıtty. Osy rette jýrnalısterge qarap:
«Shet memlekettiń azamattaryna da úgit jumystaryna aralasýǵa tyıym salynǵan. Jalpy, úgit-nasıhat jumystary buqaralyq aqparat quraldary, kandıdattyń senim bildirilgen adamynyń halyqpen kezdesýi arqyly júrgiziledi. Bul rette, buqaralyq aqparat quraldaryna da úgit jumystaryn júrgizýge tyıym salynady. Eger BAQ ókili úgit jumysyn júrgizgisi kelse, onda jumysynan ýaqytsha ketýi qajet. Iаǵnı, bir aıǵa eńbek demalysyna shyǵyp, kandıdattyń senim bildirilgen adamy retinde úgit júrgize alady», dedi. Kezekten tys prezıdenttik saılaýǵa partııa atynan usynylǵan kandıdatqa qaraǵanda ózin ózi usynǵan kandıdattyń saılaý qory birshama tómen bolatynyn aıtqan ol eger kandıdatty saıası partııa usynsa, onda uıymnyń 149 mln. 548 myń teńge qarjy bóletinin, al kez kelgen azamattyń ózi qalaǵan kandıdatqa qarjy berýine quqy barlyǵyn, biraq onyń somasy 320 mln. 460 myń teńgeden aspaýy kerektigin atap kórsetti.
«Kandıdattar saılaý qoryn ózderi quryp, oǵan jeke qarajatyn paıdalana alady. Paıdalanatyn jeke qarajattyń somasy da zańda belgilengen. Ol 106 mln. 820 myń teńgeni quraıdy. Jalpy aıtqanda, osy saılaýdaǵy ár kandıdattyń saılaý qory 576 mln. 828 myń teńge mólsherinde bolýy kerek. Odan aspaýy tıis. Al ózin ózi usynǵan azamattardyń úgitke shyǵystary tómendeý bolady. О́ıtkeni, ol kandıdatta partııa qarjysy bolmaıtyndyǵy túsinikti jaıt. Sondyqtan onyń somasy 427 mln. 280 myń teńgeni quraıdy», dedi OSK hatshysy.
Anar TО́LEÝHANQYZY,
«Egemen Qazaqstan».