Adam kapıtaly – eldi sapalandyratyn negiz

Kezdesý barysynda qatysýshylar zııatkerlik áleýet, onyń qoǵamdaǵy róli men qazirgi zaman talaptaryna saı jastardyń damý baǵyttary jóninde jan-jaqty pikir almasty. Basqosýda Ortalyq dırektory Baqytjan Temir­bolat qabyldanǵan jańa Kons­tıtýsııada adam kapıtaly eń basty qundylyq retinde aıqyn­dalǵanyn atap ótti.

«Kezdesý elimizdiń saıa­sı damýynyń mańyzdy kezeńinde ótip otyr. Jańa Konstıtýsııanyń bas­ty qaǵıdatynyń biri – azamattyń, onyń quqyq­tary men múddeleriniń basymdyǵy, sondyqtan adam kapıtaly elimizdiń basty baılyǵy bolyp jarııalandy. Búginde bilim, quzyret, ınnovasııalyq oılaý jáne belsendi azamattyq ustanym – progrestiń negizgi qozǵaýshy kúshi. Bul – stýdent jastar úshin aıryq­sha mańyzdy», degen ol eldiń bola­shaq kadryna úlken jaýapkershilik júkteletinin jetkizdi.

B.Temirbolattyń aıtýynsha, búgingi jastar – erteńgi bilikti mamandar, ǵalym, ınjener, pedagog pen dáriger retinde memlekettiń zııatkerlik ári kásibı negizin qalyptastyrady. Osylaısha, Ortalyq dırektory otandastarymyzdy jan-jaqty damýǵa, bilim men tájirıbeni ushtastyra otyryp, el ıgiligi jolynda qyzmet etýge shaqyrdy.

Statıstıkalyq derekterge kóz júgirtsek, búginde elimizde 14 pen 35 jas ara­lyǵyndaǵy shamamen 6 mıllıon jas bar. Bul – jalpy halyq sanynyń 28 paıyzy. Demek, jastar el­diń áleý­mettik-ekonomıkalyq damýynda sheshýshi ról atqarady.

Basqosýda Májilis depýtaty Nıkıta Shatalov adam kapıtalyna salynǵan ınves­tısııany eldiń bolashaǵy­na jasalǵan ınvestısııa re­tin­de baǵalady. Ol memleket azamattardy qoldap qana qoımaı, olardyń jan-jaqty damýyna jaǵdaı jasaý kerek dedi. Sonymen qatar qazirgi eńbek naryǵynda tek kásibı bilim emes, tabandylyq, ishki tártip, beıimdelgishtik jáne durys sheshim qabyldaı bilý sekildi jeke qasıetterdiń mańyzdy ekenin aıtty.

«Bir salaǵa shektelip qalmaı, ártúrli baǵytta damý, kózqarasty keńeıtý, táji­rıbe jınaý kerek. Dál osy qa­­sıetter ıkemdi oılaýǵa úı­re­tip, ýaqyt aǵymy júırik za­man­­da suranysqa ıe bolýǵa múm­­kindik beredi», dedi depýtat.

Rıo-de-Janeıro Olım­pıada­sy­nyń qola júldegeri, Azııa chempıo­naty­nyń eki dúrkin jeńimpazy, Azııa oıyndarynyń júlde­geri, UOK sportshylar komıssııasynyń múshesi Elmıra Syzdyqova jas býynǵa óz isine adal bolýdy, maqsatqa jetý jolynda tabandylyqtyń mańyzyn túsindirdi.

«Eń bastysy – adam óz isinen lázzat alýy kerek. Sporttaǵy uzaq jylǵy tájirıbemnen túıgenim – qıyndyqqa moıymaı, sátsizdikke muqalmaı, armanyńa adal bolý. Qazaqta «Táýekel túbi – jelqaıyq, ótesiń de ketesiń» deıdi. Keıde alǵa umtylýǵa batyl sheshim qabyldap, táýekelge bara bilý qajet», dedi sportshy.

Kásipker Asyljan Qazı stýdentterge bıznestegi tájirıbesimen bólisip, qıyndyqtardy eńserýge kómektesetin keńesimen bólisti. Sondaı-aq ár adam­nyń ónimdi eńbegi, el ómirine belsendi qatysýy myqty ári ádil Qazaqstannyń negizin qalyptastyratynyn atap ótti.

Pikirtalas aıaǵynda qaty­sýshylar kásibı damý, jeke brend qalyptastyrý, zamanaýı eńbek naryǵynda suranysqa ıe bolý baǵytynda naqty usynys alyp, ózderin tolǵandyrǵan suraqtaryn da qoıyp úlgerdi.