Jaqynda ótken oblys ákimdigi men Memlekettik qyzmet isteri jáne sybaılas jemqorlyqqa qarsy is-qımyl agenttigi Aqtóbe oblysy boıynsha departamentiniń bastamasymen uıymdastyrylǵan semınar-keńes sybaılas jemqorlyqqa qarsy zańnamanyń ózekti máselelerine arnaldy. Semınar-keńestiń jumysyna oblystyq atqarýshy organdar, oblystyq tekserý komıssııasy, sondaı-aq, ortalyq memlekettik organdardyń aýmaqtyq bólimsheleriniń basshylary, «Nur Otan» partııasynyń, «Atameken Odaǵy» UEP ókilderi qatysty.
Semınarǵa qatysýshylardyń aldynda sóılegen sózinde oblys ákimi apparatynyń basshysy Konstantın Petrov is-sharanyń maqsaty sybaılas jemqorlyqqa qarsy zańnamany túsindirý bolyp tabylatynyn atap ótti.
Budan keıin sóz alǵan Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamenti basshysynyń orynbasary, tártiptik keńes tóraǵasy Qaıyrjan Toqyshev sybaılas jemqorlyqqa qarsy kúres strategııasynyń negizgi erejelerin túsindirdi. Sonymen qatar, ol búginde agenttik pen onyń aýmaqtyq bólimsheleri elimizde sybaılas jemqorlyq deńgeıin azaıtý úshin, memleket pen qoǵam ómiriniń ártúrli salasynda onyń sebepteri men jaǵdaılaryn joıý úshin júrgizip jatqan keshendi sharalarǵa toqtaldy. Baıandamashy memlekettik qyzmet kórsetýdiń qol jetimdiligin, sapasyn kóterýdi jumystyń mańyzdy kórinisi retinde atady.
– Búginde azamat pen memlekettik organdardyń qarym-qatynasy, etene aralasýy memlekettik qyzmet alýmen baılanysty. Bul aralasý sybaılas jemqorlyqqa alyp kelýi múmkin. Iаǵnı, halyqtyń quqyqtyq sanasynyń tómen bolýy jáne memlekettik qyzmetti alý tártibi týraly aqparattandyrylmaǵandyǵy osy salada sybaılas jemqorlyq kórinisteriniń negizgi sebebi bolyp tabylady» dedi Qaıyrjan Toqyshev.
Osyndaı sybaılas jemqorlyq kórinisterin boldyrmaý maqsatynda búgingi kúni sheneýnikterdiń azamattarmen tikeleı baılanystaryn azaıtatyn jáne sybaılas jemqorlyq kórinisterin barynsha tejeıtin qyzmetter salasyn damytý men memlekettik apparat jumysyn aqparattandyrý jóninde keshendi sharalar qabyldanýda.
Satybaldy SÁÝIRBAI,
«Egemen Qazaqstan».
Aqtóbe oblysy.