Májilis depýtaty Ermurat Bapı aqparattyq keńistikte dinı ustazdardyń keıpin jamylyp júrgenderge qatysty kesimdi pikirin bildirdi. Ol qazaqtyń ǵasyrlar boıy qalyptasqan rýhanı qundylyqtaryn mensinbeıtin, ózge eldiń ıdeologııasyn tańǵan toptardyń áreketine tosqaýyl qoıý kerektigin alǵa tartty, dep habarlaıdy Egemen.kz.
Ermurat Bapı jelidegi «dúmshe» dindarlardyń halyq arasyna iritki salyp, dástúrli ıslam qaǵıdalaryn burmalap jatqanyn alǵa tartty.
«Búginde óziniń sandyraǵyn resmı ıslam men sharıǵattyń normasyna aınaldyrǵan, dinı bilimi kende, dinı statýsy kúdikti dúmsheler áleýmettik jelilerde órip júr. Olar qoǵamdy radıkaldyq oı-áreketke jetelep, eldegi musylman qaýymy arasyna iritki salyp, bizdiń halyq ejelden tabynatyn dástúrli ıslamnyń dinı qaǵıdalaryn burmalaýda», dedi ol.
«Malshy men veterınar joq»: Depýtat azyq-túlik qaýipsizdigine qaýip tónip turǵanyn aıtty
Halyq qalaýlysy búgingi qoǵamda «aqparattyq terrorızm» dep ataýǵa bolatyn qaýipti úrdistiń beleń alǵanyna nazar aýdardy. Ol muny halyqtyń tanym-túısigin ádeıi teris arnaǵa buryp, agressıvti ıdeologııany kúshtep tańý áreketi dep baǵalady.
«Shyn máninde bizdiń búgingi qoǵam adasý alaıaqtyǵy shylaýyna shyrmalyp, «aqparattyq terrorızm» dep ataýǵa bolatyn qııanatty qubylysqa tap boldy. Buny qoǵamdyq júıeniń qundylyqtaryn naqaq qıratý, túsinik pen túısikti teris jolǵa salý, adamdar sanasyna mańyzy ózgergen mán-maqsatty agressıvti túrde sińirý qubylysy dep qabyldaý qajet!», dedi depýtat.
Sonymen birge Ermurat Bapı búginde jastardyń dinı tanymy meshitte emes, negizinen áleýmettik jelilerde qalyptasyp jatqanyna alańdaýshylyq bildirdi. Ol resmı ınstıtýttardyń bul keńistiktegi belsendiliginiń tómendigi qaýipti propagandaǵa jol ashyp otyrǵanyn aıtty.
«Sebebi, búginde ásirese jastardyń senim-tanymy men qoǵamdyq kózqarasy dástúrli dinniń meshitterinde emes, áleýmettik jelilerde qalyptasýda. Eger bul resýrstarda resmı ınstıtýttardyń júıeli, avtorıtetti jáne zamanaýı ustanymy tapshy bolsa, bul bos qalǵan keńistikti qarabaıyr jáne qaýipti propaganda toltyrady», dep naqtylady Bapı.
Depýtat sońǵy ýaqytta áleýmettik jelide qyzý talqylanǵan «jalǵan dindarlardyń» «áıelin shákirtine syıǵa tartý» jáne «Naýryz – bizdiń mereke emes» degen sııaqty teris áreketteri men úndeýlerine de toqtalyp ótti. Onyń paıymdaýynsha, mundaı jat túsinikterdi nasıhattaý – memlekettiń konstıtýsııalyq qurylymyna qarsy shyǵýmen teń bul baǵyttaǵy teris dogmalarǵa qazirden bastap qatań toıtarys berý qajet.
«Moraldyq quqyǵymyz joq»: Depýtat mas júrgizýshilerge raqymshylyq jasaýǵa qarsy shyqty
«Is júzinde halyqtyq, qazaqtyq ulttyq dástúrlerge qarsy shyǵý – Qazaqstannyń konstıtýsııalyq qurylysyna qarsy shyǵý degen sóz! «Qazaqstan – zaıyrly memleket» dep, Ata zańda atap kórsetilgen qaǵıdatqa dinı dańǵazamen qarsy shyǵý – qylmys. Eger biz bul teris dogmaǵa búgin óte qatań jáne júıelik toıtarys bermesek, erteń tizemizdi tistelep, qapyda qalýymyz ábden múmkin. Onyń kúrt kereǵar nátıjesi bizge adam aıtqysyz aýyr tıeri kádik! Biz qyr arqasy qyrqylǵan, ishki dúnıesi tuldaı, tanym-túısigi byt-shyt bolýy shynaıy yqtımal qoǵamdy qutqarýǵa dál búgin kirispesek, bul kereǵar jaǵdaıdy túzeý áreketinen kesh qalamyz», dedi ol.
Depýtattyń aıtýynsha, elimizdiń zańyn syılamaıtyn jáne ulttyq dástúrdi jat sanaıtyndardyń ustanymy el bolashaǵyna balta shabady.
«Qundylyqtardy ǵasyrdan ǵasyrǵa saqtap qalǵan qazaqtyń qasıetti dalasy sizderge atameken emes bolar?! Endeshe, haramy joq, sizder qosh kóretin elge nege qonys aýdaryp ketpeske?! Aldy-artyńa bir ýys topyraq!», dedi Ermurat Bapı.
Sóz sońynda depýtat Bas prokýratýra men memlekettik organdarǵa onlaın ortadaǵy baqylaýdy kúsheıtýdi usyndy.