«Astana Opera» sahnasynda sáýirdiń alǵashqy kúnderi óner merekesine aınalǵan aıtýly gastrol ótti. Borıs Eıfman jetekshilik etetin Sankt-Peterbýrg akademııalyq balet teatry elorda kórermenin tereń fılosofııalyq mazmunǵa qurylǵan qos birdeı qoıylymymen tánti etti.
Gastrol shymyldyǵy «Qyzyl Jızel» baletimen túrildi. 2025 jyly jańasha tynyspen qaıta sahnalanǵan týyndy – sahna óneriniń sımvolyna aınalǵan Olga Spesıvseva taǵdyryna arnalǵan áserli arnaý boldy. Horeograf keıipker ómiriniń qasiretti belesterin – revolıýsııa daýyly, jat jerdegi jalǵyzdyq, jan kúızelisi men aqyl-sananyń kúıreýin sózsiz-aq, tek qımyldyń qudiretimen sóıletti. Árbir plastıkalyq sheshim men beıneli qozǵalys kórermendi adam janynyń eń tereń qatparlaryna jetelep, óner men ómirdiń shekarasy joıylatyn sátterdi aıqyn sezdirdi.
Al «Kúnániń ar jaǵynda» baleti keshtiń rýhanı sharyqtaý shegine aınaldy. Fıodor Dostoevskııdiń «Aǵaıyndy Karamazovtar» romany negizinde qoıylǵan bul týyndy adam bolmysynyń máńgilik qaıshylyqtaryn beıneledi. Senim men kúmán, izgilik pen azǵyndyq, qudaı men shaıtan tartysy – barlyǵy da sahna tilinde erekshe plastıkalyq órnekpen órildi. Eıfman kórermendi syrtqy oqıǵadan góri ishki álemge úńilýge shaqyryp, árkimdi óz janynyń aınasymen betpe-bet qaldyrdy.
Bul gastrol tek spektaklder legi ǵana emes, Eıfman teatrynyń kópjyldyq shyǵarmashylyq izdenisiniń aıqyn kórinisi boldy. Buǵan deıin de astanalyqtar «Roden», «Evgenıı Onegın», «Anna Karenına», «Pıgmalıon áseri» syndy qoıylymdar arqyly horeograftyń qaıtalanbas qoltańbasyna kýá bolǵan edi. Sondaı-aq Qazaqstan balet óneriniń jaryq juldyzy, «Astana Operanyń» jetekshi solısi Áıgerim Beketaeva Eıfman trýppasymen birge álem sahnalarynda óner kórsetip, ulttyq ónerdiń abyroıyn asqaqtatyp kelgeni bekzat óner jankúıerlerine jaqsy tanys.
Teatr dırektory Aleksandr Sovostıanov bul gastroldiń mańyzyn aıryqsha atap ótti. Onyń aıtýynsha, peterborlyq ujymnyń óneri balettiń tek estetıkalyq lázzat syılaıtyn janr ǵana emes, adam janynyń eń názik ıirimderin ashatyn tereń fılosofııalyq qubylys ekenin taǵy bir márte dáleldedi.