Qaıyrymdylyq qarajatyn jymqyrǵany úshin sottalǵan Perızat Qaırattyń Mercedes-Benz S450 kóligin aýksıonǵa qoıý týraly habarlandyrý jarııalanǵan edi. 7 sáýirde elektrondyq saýda portalynda Perızat Qaırattan tárkilengen kólik memlekettik organdardyń menshigine berilgeni týraly aqparat jarııalandy, dep jazady Egemen.kz.
Aýksıon nátıjesinde qymbat kólik memlekettik organdardyń menshigine berilgeni habarlandy. Dese de, kólik naqty qaı mekemege buıyrǵany aıtylmaǵan.
«Múlikti memlekettik zańdy tulǵalardyń teńgerimine berý jáne bekitý. Saýda-sattyq mártebesi: О́tti», dep jazylǵan portaldaǵy habarlandyrýda.
Buǵan deıin kólik quny – 79 415 000 teńgege baǵalanǵany belgili bolǵan.
Astana qalasynyń memlekettik múlik jáne jekeshelendirý departamenti 514ARQ01 memlekettik nómirli qara tústi Haval H6 GT avtokóligin aýksıonǵa shyǵarylǵanyn habarlady. Atalǵan kólik Perızat Qaırattyń anasy, sottalǵan Ǵaını Alashbaevanyń aǵasy Qyrymgereı Alashbaevtyń atynda bolǵan. Atalǵan kóliktiń baǵalaý quny – 11 939 000 teńge.
Eske salaıyq, 2025 jylǵy 25 shildede Perızat Qaırat 10 jylǵa bas bostandyǵynan aıyrylǵan. Sonymen qatar ol qaıyrymdylyq úshin tabystalatyn «Shapaǵat» memlekettik medalinen aıyryldy.
Perızat Qaırattyń advokaty apellıasııalyq sotqa shaǵym túsirdi
Sot úkimine sáıkes, Perızat Qaırat pen onyń anasy (oǵan da aıyptaý úkimi shyqqan) 50 jábirlenýshiniń paıdasyna jalpy somasy 1 mlrd 582 mln teńge kóleminde materıaldyq shyǵyndy óteýge mindetteldi. Budan bólek, olar 22 mln teńge kóleminde memlekettik baj salyǵyn jáne árqaısysy 698 myń teńgeden sot shyǵyndaryn tóleýi tıis.