Memleket basshysy Qasym-Jomart Toqaev ǵalymdardy marapattaý rásiminde sóz sóıledi. Ol mereke qarsańynda Aqordaǵa jınalyp, bas qosý jaqsy dástúrge aınalǵanyn, bul – elimizdiń ǵalymdar qaýymyna degen erekshe qurmeti jáne aıryqsha yqylasynyń kórinisi ekenin aıtty, dep habarlaıdy Egemen.kz.
Prezıdent aldymen ǵalymdardy Ǵylym qyzmetkerleri kúnimen quttyqtady.
«Ár eldiń ǵylymı áleýeti – onyń abyroı-bedeli men kúsh-qýatynyń ólshemi desek, qate bolmaıdy. Ǵylymǵa basymdyq beretin, ǵalymyn qadirleıtin, basqasha aıtsaq, «ǵylym-bilim bar jurttar» ǵana órkenıettiń órine shyǵady. Bul – aqıqat. Túptep kelgende, adamzattyń barlyq jetistigi ǵalymdardyń zııatkerlik eńbeginiń jemisi ekeni sózsiz. Qazir osy zalda túrli salada zor tabysqa jetken zerdeli zertteýshilerimiz otyr. Sizder ult sapasyn arttyrýǵa, halyqtyń ál-aýqatyn jaqsartýǵa mol úles qosyp kelesizder. Barshańyzǵa shynaıy rızashylyǵymdy bildiremin. Hakim Abaı aıtyp ótkendeı, «Adam balasy adam balasynan aqyl, ǵylym, ar, minez degen nárselermen ozbaq». Bul – eshqashan ózektiligin joǵaltpaıtyn taǵylym. Biz básekege qabiletti el bolamyz desek, eń aldymen, ǵylymdy damytyp, jańa tehnologııany, jasandy ıntellektini meńgerýimiz kerek», dedi Prezıdent.
Sondaı-aq Memleket basshysy ǵylymǵa kórsetilip jatqan júıeli qoldaý sharalaryna toqtaldy.
«О́zderińizge málim, men osy jyldy Sıfrlandyrý jáne jasandy ıntellekt jyly dep jarııaladym. Ǵylymǵa bet burý – ósip-órkendeýge umtylǵan árbir eldiń tarıhı mindeti. Biz muny jaqsy túsinemiz. Memleket ǵylym salasyna únemi qoldaý kórsetýde. Keıingi 5 jylda osy salaǵa bólinetin qarjy kólemi 6 eseden asty. Qazaqstanda zertteý ýnıversıtetteriniń sany kóbeıip jatyr. Ǵylymı jobalarǵa ınvestısııa salatyn bıznes ókilderine salyq jeńildigi beriletin boldy. Aldymyzda taǵy bir mańyzdy mindet tur. Biz jas ǵalymdar ǵylymmen alańsyz aınalysýy úshin qolaıly jaǵdaı jasaýymyz qajet. О́ıtkeni qazaq ǵylymynyń bolashaǵy – kózi ashyq, kókiregi oıaý, oıy ushqyr jáne maqsaty bıik jastardyń qolynda», dedi ol.
Prezıdent talapty ári talantty azamattar keleshekte ulttyń shamshyraǵyna aınalatynyn, olar Qanysh Sátbaev sııaqty alyp tulǵalardyń jolyn jalǵaıtynyn, sondyqtan jas zertteýshilerge qamqor bolýdyń mańyzdylyǵyn atap ótti.
«Bul baǵytta naqty bastamalar júzege asyrylyp jatyr. Qazirgi tańda 600-den astam jas ǵalymǵa baspana berildi. Budan bólek, olarǵa arnaýly granttar bólinip jatyr. Jyl saıyn jas zertteýshiler álemniń jetekshi ǵylymı ortalyqtaryna baryp, tájirıbe jınap, taǵylym alyp júr. Osyndaı naqty sharalar aldaǵy ýaqytta da jalǵasyn tabady», dedi Memleket basshysy.