Qytaıdyń Ýlanchabe qalasynan qýanyshty habar keldi. Osynda 13 tamyzda márege jetken bokstan áıelder arasyndaǵy Azııa chempıonatynda qazaqstandyq Darıǵa Shákimova 75 kıloǵa deıingi salmaqta qurlyq chempıony atandy.
Fınaldyq shaıqasta alań ıesi – qytaı sportshysy Lı Kııýanmen qolǵap túıistirgen Darıǵa 3:0 esebimen jeńiske jetti. Sóıtip, Azııanyń eki dúrkin chempıony degen ataqqa qol jetkizdi. Ol birinshi ret 2010 jyly Almatyda ótken qurlyq birinshiliginde 69 kıloǵa deıingi salmaqta altynnan alqa taqqan edi. Darıǵa – Petropavl boksynyń túlegi. 1988 jylǵy 20 qarashada týǵan. Qazaqstannyń 2012 (75 kg salmaqta), 2013, 2014, 2015 (úsheýinde de – 69 kg) jyldarǵy chempıony.
Ony úlken boksqa alyp kelgen jeke jattyqtyrýshysy Serik Bekturǵanov bolsa, quramada bas bapker Vadım Prısıajnıýktiń baqylaýynda jattyǵady. Azııa birinshiliginde qazaqstandyq sapynan taǵy úsh boksshy qola júlde aldy. Oǵan Gaýhar Ermekbaı (69 kg), Móldir Bazarbaeva (81 kg) jáne Lázzat Kúngeıbaeva (+81 kg) syndy atletter qol jetkizdi. Chempıonatta 6 altyn, 1 kúmis jáne 1 qola medalǵa qol jetkizgen Qytaı quramasyna teń keler eshkim bolmady. Ekinshi orynǵa 2 altyn medali bar Taıland qyzdary ornalasty. Al 1 altyn, 3 qola medaldy Qazaqstan jasaǵy úshinshi satyǵa kóterildi.
Damır QOJAMQUL.