«Kóz qorqaq, qol batyr» degen, Jaqsylyq aǵa o basta ardagerler ansamblin quratyn kezde «Bul istiń sońy qalaı bolar eken?» dep eptep júreksingen eken. Qansha degenmen nemere-shóbereleriniń qylyǵyna toımaı, beınetiniń zeınetin kórip otyrǵan aqsaqaldardyń endigi jerde qoǵamdyq jumysqa qulqy bola ma? Qurmetti demalystaǵy qarııa ózin úlken ortadan alys ustap, jany tynyshtyqty qalaıtyny belgili ǵoı.
Áıtse de, eńbekpen eseıip, bar kúsh-jigerin eli úshin jumsaǵan ardagerler eshqashan da qoǵamnan, ortadan alystap ketpeıdi eken. Qarttyq degen endi qolyńnan eshteńe kelmeıdi degen sóz emes. Qaıta ár iske baıyppen qarap, ómirlik tájirıbeńdi, kórgen-túıgenińdi keıingige úıretetin, jastarǵa qoldaý kórsetip, isimen de, sózimen de úlgi bolatyn shaq emes pe? Osyny uǵynǵan ardagerler Jaqsylyq aǵanyń usynysyn birden qoldaı ketipti. Sóıtip, Taraz qalasynda ardagerler ansambli quryldy. Odan beri de úsh jyldan astam ýaqyt ótipti.
– Bizdiń uıymda 3 myń 700 ardager men zeınetker múshe bolyp tirkelgen, – deıdi Taraz qalalyq ardagerler uıymy №10 aýmaqtyq okrýginiń tóraǵasy Jaqsylyq Dosaev. – Onyń ishinde 104 jasqa kelgen bir ájemiz jáne 7 soǵys ardageri bar. О́tken jyly bizdiń ardagerler ansambli qala boıynsha ótken baıqaýda birinshi orynǵa ıe boldy. 45 óner ujymy qatysqan oblystyq baıqaýda júldeli úshinshi orynnan kórindik. Al sáýir aıynyń ortasynda Astanada ótken «Qaıran, erler – qaharman ardagerler!» atty respýblıkalyq baıqaýǵa Jambyl oblysynyń atynan qatysyp, ekinshi orynǵa ıe boldyq. Ansamblde 15 ardager óner kórsetedi. Árıne, ol ardagerlerdiń kóbisi zeınetkerlikke deıin qurylysshy, temirjolshy, basqa da mamandyqtar boıynsha eńbek etken. Eń jasy úlkeni jaqynda 80-ge toldy. Olarǵa óner salasynda talaı jyl eńbek etken Seısenbi Beıseýov jetekshilik etýde. Sondaı-aq, Serik Sabyrbekov, Jańbyrbaı Jolmaǵambetov, Qorabaı Esdáýletov, Turar Berdiqojaev, Bekjan Ildenbaev sııaqty termeshi-ánshilerimiz bar. Shúkirshilik, eldiń joǵary baǵasyn aldyq, ardagerlerdiń abyroıy artty. Sol abyroıdy odan saıyn bıiktetip, nyǵaıta túsýge tıispiz. Aqsaqal aıtqan ataly sóz eshqashan aıaqqa basylmaǵan. Osy aımaqtaǵy daý-damaı, aǵaıyn arasyndaǵy urys-keristi syrtqa shyǵarmaı, óz ortalarynda sheship, týystyqty, birlikti, eldikti nasıhattap júrgen osynaý ómirlik tájirıbesi mol, danagóı ardagerlerdiń el ishinde yqpaly óte zor eken. Endeshe, jastarymyz osyndaı el aǵalaryna, qazynaly qarııalaryna qarap, oıyn da boıyn da túzese, nur ústine nur bolar edi.
Oralhan DÁÝIT, «Egemen Qazaqstan».
Jambyl oblysy.